Trump aahidi kuunda silaha zaidi za nyuklia

RAIS Marekani, Donald Trump amesema anataka Marekani iimarishe silaha zake za nyuklia, hiyo ikiwa ni mara yake ya kwanza kuzungumzia silaha za nyuklia tangu aingie madarakani Januari 20, mwaka huu.

Amesema inaweza kuwa vyema sana iwapo hakungekuwa na taifa lolote lililo na silaha za nyuklia duniani. Lakini, amesema iwapo hilo haliwezekani, basi Marekani itahakikisha inakuwa miongoni mwa nchi zinazoongoza kwa silaha za nyuklia.

Amekaririwa akisema; “Marekani imeachwa nyuma sana katika uwezo wake wa silaha za nyuklia”. Hata hivyo, wakosoaji wanasema Marekani na Urusi tayari zina silaha za kutosha za nyuklia.

Marekani ina silaha 6,800 za nyuklia na Urusi 7,000, kwa mujibu wa chama cha udhibiti wa silaha cha Marekani.

“Mimi ndiye mtu wa kwanza ambaye angependa kuona kwamba hakuna mtu aliye na silaha za nyuklia, lakini hatutakubali kuachwa nyuma na taifa lolote lile, hata kama ni taifa rafiki, hatutaachwa nyuma katika uwezo wa nyuklia,” amekaririwa na shirika moja la habari.

Aliongeza; “Linaweza kuwa jambo zuri, ndoto nzuri endapo hakuna taifa lingekuwa na silaha za nyuklia, lakini iwapo mataifa yatakuwa na silaha za nyuklia, tutakuwa miongoni mwa wanaoongoza.”

Matamshi yake hayo yanakariri ujumbe aliouandika kwenye Twitter wiki chache zilizopita baada yake kushinda uchaguzi wa urais, ambapo aliahidi kuimarisha uwezo wa nyuklia wa Marekani.

Mkataba wa kupunguza silaha za nyuklia kati ya Marekani na Urusi, ambao unaitwa New Start (Mwanzo Mpya) unazitaka nchi hizo mbili, kufikia 5 Februari mwaka ujao, kupunguza silaha zao kwa kiasi sawa kwa miaka 10.

Chama cha udhibiti wa silaha cha Marekani, ambalo ni shirika huru lisiloegemea upande wowote, limekosoa tamko la Trump.

Add a comment
Imeandikwa na WASHINGTON, Marekani
Mavumbuo: 904

Zuma aonya wanaoshambulia raia wa kigeni Afrika Kusini

RAIS wa Afrika Kusini, Jacob Zuma, amelaani kuzuka upya kwa tabia ya kuwashambulia raia wa kigeni wanaoishi nchini hapa.

Zuma amesema raia wengi wa kigeni wanaoishi Afrika Kusini, ni watu wanaoheshimu sheria na kuchangia kwa kiasi kikubwa ukuaji wa uchumi wa taifa hilo. Amesema ni makosa kwa raia wa nchi hiyo kuwaona wageni kama ni maadui wasiofaa kushirikiana nao.

Licha ya kauli hiyo ya Zuma, waandamanaji tayari wamefunga barabara mjini Pretoria kwa kuchoma moto matairi ya magari wakijiandaa kuandamana kwa kile wanachokiita kupinga raia wa kigeni kuchukua nafasi kazi za wenyeji, hivyo kuwaongezea ugumu wa maisha.

Vuguvugu hilo la Afrika Kusini linakuja siku chache baada ya raia wa nchi jirani ya Msumbiji kufanya vurugu kubwa na kutimua raia wa kigeni nchini humo.

Miongoni mwa waathirika wakubwa wa vurugu hizo za Msumbiji ni zaidi ya raia wa Tanzania 5,200 ambao tayari wameshatimuliwa na kuripotiwa kuporwa fedha na mali zao, lakini pia Watanzania hao wakilalamikia kunyanyaswa kwa kuporwa mali, kupigwa na hata kuwapo kwa madai ya wanawake kubakwa.

Aidha, Watanzania wamelaani kwa kiasi kikubwa unyanyasaji huo, wakiwataka raia wa Msumbiji kukumbuka wema waliofanyiwa na Watanzania wakati wa harakati za ukombozi wa nchi hiyo ambayo karibu viongozi wake wote wakuu waliishi Tanzania wakati wa harakati za kupigania uhuru.

Add a comment
Imeandikwa na JOHANNESBURG, Afrika Kusini
Mavumbuo: 798