Aweso atoa maelekezo maji Wami Sokoine

WIZARA ya Maji imeuagiza  Mfuko wa Taifa wa Maji (NWF), kutoa fedha ya dharura Sh milioni 100 kwa ajili ya ujenzi wa mradi wa uchimbaji kisima kirefu cha  maji eneo la Wami Sokoine  ( Ranchi ya  Wami -Sokoine),Wilaya ya Mvomero  mkoani Morogoro, ambalo wakazi wa maeneo hayo wanatumia maji yasiyo salama ya kwenye madimbwi.

Waziri wa Maji Jumaa Aweso alitoa agizo hilo  mjini Morogoro kwa uongozi wa mfuko huo wakati wa ziara ya kutembela, kukagua na kuzindua miradi ya maji.

“ Kuna eneo  la Ranchi ya Wami Sokoine ukipita kwenda Dodoma kuna watu pale huwa wanahangaika na maji, wanachukua maji kwenye madimbwi kwa ajili ya matumizi ya nyumbani.

“Hii  hapana , Mheshimiwa Rais  Dk Samia Suluhu Hassan ametuelekeza sisi Wizara ya Maji jukumu letu mahususi watu wapate maji, “ alisema Aweso.

Kutokana na  hali hiyo aliuagiza mfuko huo  kutoa fedha ya  dharura Sh milioni 100  na  kukabidhiwa Mamlaka ya Maji Safi na Usafi wa Mazingira Morogoro (MORUWASA), kwa ajili ya kazi ya uchimbaji visima virefu iweze kuanza mara moja  katika eneo hilo.

Aweso alisema  kuwa dhamira ya Rais ni kuona wananchi wa mijini na vijijini wanapata maji safi na salama, hivyo   alimwagiza  Mkurugenzi Mtendaji wa Moruwasa  kusimamia jambo hilo ndani ya muda mfupi.

“ Serikali imewekeza fedha nyingi katika miradi  ya maji na lengo ni kuhakikisha watu wanapata huduma ya maji na sasa tuongeze kasi  katika utoaji wa huduma, ili mambo yaende sawa,” alisema Aweso

Naye Kaimu Meneja wa  Wakala wa Maji  na Usafi wa Mazingira Vijijini (RUWASA) Mkoa wa Morogoro, Mhandisi Sospeter Lutonja, alisema  kwa  jukumu la usimamizi wa utoaji wa huduma za maji  eneo hilo lipo chini ya Moruwasa.

Kwa upande wake Mkurugenzi Mtendaji wa Moruwasa , Mhandisi Tamim Katakweba alisema baada ya kukabidhiwa usimamizi wa maji eneo hilo,  tayari  umefanyika upembuzi yakinifu kwa ajili ya kuchimba kisima kirefu cha maji na kuwasilisha maombi ya kupata fedha ili kazi ianza mara moja.

Habari Zifananazo

Back to top button