loader
Picha

Mradi wa maji wamuweka pabaya DED

WAZIRI Mkuu, Kassim Majaliwa amemuagiza Mkuu wa Wilaya ya Lindi, Shaibu Ndemanga ampelekee taarifa za utendaji kazi wa Mkurugenzi Mtendaji (DED) wa Halmashauri ya Wilaya hiyo, Waryoba Gunza baada ya kushindwa kutoa maelezo kuhusu utekelezaji wa mradi wa maji Kata ya Rutamba.

Alitoa agizo hilo jana wakati akizungumza na wananchi katika mkutano wa hadhara uliofanyika kwenye Kijiji cha Rutamba akiwa katika ziara yake ya kikazi ya kukagua shughuli za maendeleo na huduma za jamii mkoani Lindi. Waziri Mkuu alitoa agizo hilo baada ya kumtaka DED huyo atoe maelezo ya namna gani walivyojipanga katika kutekeleza mradi wa maji kwenye kata hiyo ambayo wakazi wake wanakabiliwa na tatizo la upatikanaji wa maji na kushindwa kutoa maelezo.

Kwa mujibu wa Mhandisi wa Maji wa Wilaya ya Lindi, Idd Pazi, mradi wa kata hiyo unakabiliwa na tatizo la uchakavu wa miundombinu na ukarabati wake unahitaji bajeti Sh milioni 75 ambazo wameziomba kutoka Wizara ya Maji. Waziri Mkuu alisema miradi yote ambayo gharama zake ziko chini ya Sh milioni 100 inatakiwa itekelezwe kwa kutumia fedha za ndani ya halmashauri husika.

“Miundombinu hiyo ilitakiwa iwe imebadilishwa. Mradi wa shilingi milioni 75 unaomba fedha wizarani ni uvivu,” alisema na kuongeza kuwa suala la huduma ya maji limewekewa msisitizo na Rais John Magufuli kwa kuanzisha kampeni ya kumtua mama ndoo kichwani inayolenga kuwawezesha wananchi kupata maji safi na salama karibu na makazi yao.

Aliwaambia wananchi kuwa Serikali ya Awamu ya Tano ina mikakati mizuri inayolenga kuondoa tatizo la maji kote nchini ili kusaidia wananchi hao hasa wanawake kutumia muda mwingi kufanya kazi za maendeleo kuliko kutafuta maji. Hata hivyo, Waziri Mkuu amewahakikisha wananchi hao kwamba licha ya kuagiza mradi huo wa ukarabati wa miundombinu ya kusambazia maji ufanyike kwa haraka, pia serikali inatekeleza mradi mwingine wa maji wa Milola ambao ukikamilika maji yatafikishwa hadi Rutamba.

Wakati huo huo, Waziri Mkuu amewaagiza wakuu wa wilaya nchini wahakikishe wanawasimamia vizuri watumishi wa umma na kuwachukulia hatua wote watakaobainika kushindwa kutekeleza majikumu yao ipasavyo.

“Rais Dk John Pombe Magufuli ana nia njema ya kuwapa huduma safi wananchi wote hadi wanyonge na ameelekeza wahudumiwe vizuri bila ya ubaguzi. Wananchi kama kuna mtumishi asiyewahudumia vizuri msisite kumtaja kwa sababu serikali hii haitomvumia,” alisema.

Alisema ni lazima kila mtumishi wa umma anayelipwa mshahara kwa kutumia kodi za wananchi ahakikishe anatekeleza ipasavyo majukumu yake kwani asipofanya hivyo hatokuwa na nafasi ya kuendelea na kufanya kazi ndani ya serikali.

“Watumishi fanyeni kazi kwa bidii na msitarajie kuundiwa tume pale mnapofanya vibaya, ukiharibu kazi tunakushughulikia hapo hapo na huu ndio msimamo wa Serikali ya Awamu ya Tano inayoongozwa na Rais Dk John Magufuli,” alibainisha.

Waziri Mkuu alisema watumishi wanatakiwa wafanye kazi kwa kuzingatia sheria na kanuni za kazi na pia watambue dhamana kubwa waliyonayo, ambayo ni kuwahudumia wananchi wote bila ya ubaguzi wa aina yoyote.

Alisema watumshi wa umma hawapaswi kukaa maofisini, bali wanatakiwa wapange siku nne katika juma kwa ajili ya kwenda kutembelea wananchi hususani waishio maeneo ya vijijini kuwasikiliza kero zao na kuzipatia ufumbuzi. Alisema serikali imedhamiria kuboresha huduma za jamii ambazo zilikuwa zikiwakwaza wananchi zikiwemo za miundombinu ya barabara, maji, elimu na afya, lengo likiwa ni kuwawezesha Watanzania wote waishi vizuri.

Awali, akizungumza kwa niaba ya wabunge wa Mkoa wa Lindi, Mbunge wa Viti Maalumu, Riziki Lulida alisema wakazi wa Kata ya Rutamba wanakabiliwa na changamoto ya upatikanaji wa huduma ya maji licha ya kuwepo kwa vyanzo, hivyo aliiomba serikali iwasaidie.

Jumuiya ya Afrika Mashariki (EAC) imetangaza siku za ...

foto
Mwandishi: Mwandishi Maalumu, Lindi

Weka maoni yako

Habari Nyingine

Categories

habari zaidi zinazoendana na hii

mpya # zaidi