loader
Dstv Habarileo  Mobile
Samia, Masisi wakubaliana kukuza biashara na uwekezaji

Samia, Masisi wakubaliana kukuza biashara na uwekezaji

RAIS Samia Suluhu amemhakikishia Rais wa Jamhuri ya Botswana Mokgweetsi Masisi kuwa Tanzania itaendeleza na kukuza zaidi uhusiano na ushirikiano wake na nchi hiyo hususan katika kukuza biashara na uwekezaji.

Hayo yamejiri leo Juni 10, 2021 Ikulu Jijini Dar es Salaam muda mfupi baada ya kufanya mazungumzo rasmi na Rais Masisi ambaye ameanza ziara ya kikazi ya siku mbili hapa nchini kwa mualiko wa Rais Samia.

Kwa mujibu wa taarifa kutoka Kurugenzi ya Mawasiliano Ikulu, Rais Samia amesema Botswana na Tanzania zina uhusiano wa kidugu na kihistoria ulioasisiwa na Baba wa Taifa Hayati Mwl. Julius Kambarage Nyerere na Rais wa kwanza wa Botswana Hayati Seretse Khama hivyo hakuna sababu kwa nchi hizi kuwa na kiwango kidogo cha biashara ikilinganishwa na ukubwa wa uhusiano wake.

Amefafanua kuwa mwaka 2018 biashara kati ya Tanzania na Botswana ilikua kutoka Sh milioni 731 hadi Sh bilioni 3.5 na kwamba Botswana imewekeza hapa nchini kiasi cha dola za Kimarekani milioni 231 zilizoajiri Watanzania 2128.

Aidha, Rais Samia amesema katika kukuza uhusiano huo Tanzania ipo tayari kushirikiana na Botswana katika kuboresha ufugaji, kunufaika na uwekezaji wa madini hususan almasi, kukuza utalii na kupeleka walimu wa kufundisha lugha ya Kiswahili katika shule na vyuo vya Botswana.

Amemhakikishia Rais Masisi kuwa Tanzania italinda uwekezaji wowote kutoka Botswana kwa manufaa ya pande zote mbili na amewasihi wawekezaji kutoka Botswana na kwingineko duniani kuja nchini Tanzania kuwekeza kwa kuwa mazingira ya uwekezaji ni mazuri.

Rais Samia amewataka Mawaziri na wataalam wa Tanzania na Botswana kufufua kamati ya kudumu ya pamoja (JPC) ambayo haijakutana tangu mwaka 2009 kukutana haraka iwezekanavyo ili kupitia maeneo yote ya ushirikiano na kuongeza maeneo mapya kwa manufaa ya pande zote mbili.

Kwa upande wake, Rais Masisi amemshukuru Rais Samia kwa kumualika kuja hapa nchini, amempongeza kwa kupokea kijiti cha Urais na amemuhakikishia kuwa yupo tayari kumpa ushirikiano wowote atakaohitaji na kukuza zaidi uhusiano wa Tanzania na Botswana.

Rais Masisi amesema kutokana na uhusiano mzuri, udugu na urafiki uliopo kati ya Tanzania na Botswana nchi hizo hazina budi kudumisha amani na utulivu ili kutoa nafasi ya kukua kwa uchumi na ustawi wa wananchi wake.

Ameongeza kuwa Botswana iko tayari kubadilishana uzoefu na Tanzania katika masuala ya madini hususan almasi, ufugaji na utafutaji wa masoko ya bidhaa mbalimbali.

Rais Masisi ameungana na Rais Samia kutaka JPC ikutane ndani ya miezi tatu na amemualika Rais Samia kufanya ziara rasmi nchini Botswana.

Baadaye leo Rais Masisi atahudhuria Dhifa ya Kitaifa iliyoandaliwa na Rais Samia kwa heshima yake.

https://www.apps.tsn.go.tz/public/uploads/227f5cb8d3cb605f8732473a80561214.jpeg

RAIS wa Zanzibar,  Dk Hussein Mwinyi amesema wakati umefika kwa ...

foto
Mwandishi: Mwandishi Wetu

Post your comments

Tangazo

CRDB

Habari Nyingine

Categories

habari zaidi zinazoendana na hii

mpya # zaidi