loader
Dstv Habarileo  Mobile
Watalii wazidi kumiminika hifadhi ya Taifa ya Nyerere

Watalii wazidi kumiminika hifadhi ya Taifa ya Nyerere

MAKUNDI ya watalii kutoka ndani na nje ya nchi jana wametembelea hifadhi ya Taifa ya Nyerere ikiwa ni hatua ya kuadhimisha kumbukumbu ya kifo cha Mwalimu Julius Nyerere.

Akizungumza katika hifadhi hiyo iliyoko Wilaya ya Kisarawe,Mkoani Pwani,Mhifadhi Mwandamizi, Seti Mihayo amesema hifadhi hiyo ni kubwa barani Afrika na inawanyama wa aina mbalimbali.

"Hifadhi hii ni ya kipekee sana kwasababu inavivutio tofauti tofauti ikiwemo wanyama adimu kama Mbwa mwitu,ndege aina 450 na ina twiga wengi zaidi nchini.

Ameongeza "Hifadhi ina ukubwa wa kilometa 30, 893 ambayo ilitengwa kutoka katika pori la akiba la Selou kwamaana kwamba ni hifadhi kubwa Afrika na ina Mito kama Rufiji ambao ni Mkubwa na Mto Kilombero.

Amesema hifadhi hiyo iko karibu na Mkoa wa Dar es Salaam ambapo ni takribani kilometa 190  huku kwa mkoa wa Morogoro ikiwa ni kilometa 162.

Amesema miongoni mwa kivutio kingine ambacho kipo ndani ya hifadhi hiyo ni mti wa maajabu ambao uligoma kung'olewa ili kupisha ujenzi wa barabara.

"Mti huo zamani ulitumika kwa matambiko kwani wakati huo ndani ya hifadhi hii kulikuwa na vijiji ambavyo waliutumia na baada ya kujaribu kuung'oa imeshindikana kutokana na vifaa kuharibika hivyo tumeamua kuuacha ili kuwa sehemu ya kivutio,"amebainisha

Mihayo ametoa wito kwa Watanzania kutembelea hifadhi hiyo ili kujionea vivutio hivyo vya wanyama na kihistoria.

Miongoni mwa makundi yaliyotembelea hifadhi hiyo ni Tanzania Land rover Club kutoka Dar es Salaam na Morogoro.

Mratibu wa kikundi hicho Meja Mbuya amesema wameamua kutembelea sehemu hiyo ili kuhamasisha utalii wa ndani katika hifadhi hiyo.

"Tumetumia usafiri wa Landrover kwasababu baba wa Taifa alitumia aina hii ya gari katika harakati za ukombozi wa nchi na pia viongozi wengi wa Afrika wametumia katika kupigania uhuru wa bara la Afrika.

Kwa upande wako mmoja wa watalii wa ndani, Maria Wilson alisema amekuja kutembelea hifadhi hivyo ikiwa ni sehemu ya kumkumbuka Hayati Nyerere.

"Ninaamini kuwa nitaona mengi na nitajifunza vitu vingi kupitia hifadhi hii na pia nimekuja na wanafunzi zaidi ya 100 wa shule ya msingi Mloka na wao watajifunza kuhusu baba wa taifa na wataona wanyama mbalimbali.

Naye mmoja wa wanafunzi waliotembelea hifadhi hiyo, Mustakim Kingwande, alisema anamfahamu baba wa Taifa kwa kumsoma katika vitabu vya histori hivyo fursa ya kutembelea hifadhi ni nafasi nzuri ya kujifunza.

"Nimekuwa nikiendelea kujifunza kuhusu mwalimu Nyerere na nilitamani kutembelea hifadhi yake ili kujifunza nimefanikiwa nafurahi kwa hili,"alieleza.

 

foto
Mwandishi: Aveline Kitomary

Post your comments

Tangazo

CRDB

Habari Nyingine

Categories

habari zaidi zinazoendana na hii

mpya # zaidi