Kapinga ataka utekelezaji mipango kazi SIDO

DAR ES SALAAM: WAZIRI wa Viwanda na Biashara, Judith  Kapinga, amewataka watumishi wa Shirika la Maendeleo ya Viwanda Vidogo (SIDO) kutekeleza mipango kazi yenye tija ili kuchochea ajira nyingi nchini kupitia viwanda vidogo, hususan kwa kundi maalumu la vijana.

Wito huo umetolewa leo jijini Dar es Salaam wakati wa ziara yake ya siku ya tatu katika shirika hilo.

Kapinga amesema maagizo hayo yanaenda sambamba na Dira ya Taifa 2050, iliyozinduliwa Julai 17, ambayo miongoni mwa malengo yake ni kutoa ajira kwa Watanzania ifikapo mwaka 2030.

Amesisitiza kuwa jukumu la SIDO ni muhimu katika kufanikisha azma hiyo kwa kuhakikisha miradi na mikakati wanayoipanga inalenga matokeo halisi kwa wananchi.

Aidha, Waziri Kapinga amewataka watumishi wa SIDO kuunga mkono jitihada na ahadi za Rais ndani ya siku 100, ikiwemo utekelezaji wa Mfuko wa Fedha wa Sh bilioni 200 pamoja na uanzishwaji wa mitaa ya viwanda katika kila wilaya nchini. Amesema hatua hizo zitatoa fursa pana zaidi za ajira na kuinua uchumi wa wananchi, hasa vijana.

Kwa upande wake, Mwenyekiti wa Bodi ya SIDO, Prof. Musa Nyamsengwa, amesema shirika hilo linatambua mwamko mkubwa wa wananchi wanaohitaji huduma za uendelezaji viwanda vidogo. Ameahidi kuwa SIDO itaendelea kuboresha huduma, kuimarisha ushirikiano na sekta binafsi na kuhakikisha wananchi wanazifikia huduma hizo kwa urahisi.

Naye, Naibu Katibu Mkuu wa Wizara ya Viwanda na Biashara, Dk Suleiman Serera, amesema SIDO ni injini muhimu ya kukuza sekta ya viwanda vidogo na kuongeza mchango wake kwenye uchumi wa taifa. Amesisitiza kuwa wizara itaendelea kuunga mkono juhudi za shirika hilo katika kutekeleza majukumu yake kwa ufanisi.