Mahakama: ‘Jaji Mkuu ruksa kuendelea na kazi’
DAR ES SALAAM: Mahakama Kuu Masjala Kuu ya Dar es Salaam imetupilia mbali shauri la Wakili wa Kujitegemea Humphrey Simon Malenga alilolifungua dhidi ya Mwanasheria Mkuu wa Serikali ya Tanzania kupinga Jaji Mkuu kuongezewa muda wa utumishi.
Katika hukumu iliyotolewa leo Mahakamani hapo na Jaji Geofrey Isaya, Mahakama imeeleza kuwa Kifungu cha 118(2) cha Katiba hakikai pekee, na kwa kuzingatia Kifungu hicho katika kufafanua umri wa kustaafu wa Jaji Mkuu wa Tanzania, ni lazima kurejelea vifungu vya 120(1), 120(2), (3), na (4) vya Katiba.
Malenga alifungua shauri Mahakamani hapo kuomba Mahakama hiyo kutoa tafsiri ya Uamuzi wa Rais Samia Suluhu Hassan kumuongezea muda wa utumishi Jaji Mkuu Profesa Ibrahimu Juma ambaye Juni 15, mwaka huu alifikisha miaka 65 anayotakiwa kustaafu utumishi na nafasi kama kiongozi wa muhimili huo.
“Uamuzi huo ulizingatia kanuni za kimsingi za uchambuzi wa Katiba, ikiwa ni pamoja na kusoma Katiba kwa ujumla wake na kuepuka kutoa kipaumbele kwa kifungu kimoja na kudhoofisha vingine.
“Mahakama ilibaini kuwa Kifungu cha 118(2) hakijitoshelezi na hufanya marejeo kwa umri wa kustaafu wa Jaji wa Rufani. Kwa hivyo, ili kujua umri wa kustaafu wa Jaji Mkuu, inapaswa kusomwa Kifungu cha 120(1) pamoja na Kifungu cha 120(2), (3), na (4) cha Katiba,” ilisema sehemu ya hukumu hiyo iliyotolewa leo Septemba 22.
Uamuzi wa mahakama ulisisitiza umuhimu wa kusoma na kuelewa Katiba kwa ujumla wake na kutafsiri vifungu vyake kwa kuzingatia lengo na lengo la Katiba nzima.
Mahakama ilisema madaraka yaliyowekwa kwa Rais kwa mujibu wa Kifungu cha 120(3) kinaweza kutumika kwa Jaji wa Rufani, ambaye pia ni Jaji Mkuu. “Kwa hiyo, uamuzi wa kusimamisha umri wa kustaafu na/au kuongeza muda wa utumishi wa Jaji wa Rufani ambaye ni Jaji Mkuu kwa maslahi ya umma unakubalika kikatiba,” ilisema hukumu hiyo.
Kwa kuzingatia uamuzi huo, mahakama ilikataa maombi yaliyowasilishwa mbele yake na kusema kuwa hayana msingi. Hivyo, kesi ilikataliwa na hakukuwa na amri kuhusu gharama za kesi hiyo.
