Taasisi za haki jinai zatakiwa kuajiri wataalam wa lugha ya alama

MOROGORO: TUME ya Rais ya Kuangalia Jinsi ya Kuboresha Taasisi za Haki Jinai ambayo kwa sasa imekuwa ni Kamati imeshauriwa kupendekeza kwa  taasisi za kijeshi kuweka  utaratibu wa  kuajiri  wataalamu wa lugha  ya alama na maandiko ya nukta nundu ili kuwasaidia watanzania wenye matatizo  hayo kuweza  kuwasiliana na wenzao wa urahisi.

Tume hiyo ambayo kwa hivi sasa  imekasimiwa madaraka na kuwa Kamati ya kusimamia na kufuatilia utekelezaji wa mapendekezo yake  kwa taasisi zenye mifumo ya haki jinai  ambazo zinakadiriwa kufikia 18.

Mwenyekiti wa Chama cha Mapinduzi (CCM) Wilaya ya Morogoro mjini Kichama , Fikiri Juma  alitoa pendekezo hilo  mjini Morogoro wakati wa kongamano lililoandaliwa na Tume hiyo  ikiongozwa na  Mjumbe wake, Mkuu wa Jeshi la Polisi Mstaafu ,Balozi Ernest Mangu.

Kongamano hilo liliwakutanisha wadau mbalimbali kwa lengo la  kupata maoni yao juu ya mapendekezo yaliyotolewa na tume hiyo kwa  Rais ambalo  likilenga  kupata  maoni juu ya mapendekezo ya kuboresha wa taasisi za haki jinai .

Fikiri katika mapendelezo yake kwa tume hiyo , alishauri ya kwamba kuna haja ya  kubadilisha jina la Magereza na kuitwa chuo cha mafunzo ili wafungwa wapate mafunzo badala ya mateso.

Pia alipendekeza  ya kwamba  Taasisi za kijeshi ziajiri Wataalam wa lugha ya alama na wale wa nukta nundu ili kuwasaidia watanzania wenye matatizo ya kusikia na walioona kuweza kuwasiliana na wenzao kwa urahisi.