Uandikishaji darasa la kwanza washika kasi Morogoro

MKUU wa mkoa wa Morogoro, Fatma Mwassa amesema uandikishaji wa wanafunzi wa darasa la awali na darasa la kwanza katika shule mbalimbali za msingi katika mkoa huo umekuwa na mafanikio makubwa kutokana na uhamasishaji uliofanyika kwa wazazi na walezi .

Mwassa amesema hayo katika taarifa  yake kwa Waziri wa Nchi, Ofisi ya Rais ,Tawala za Mikoa na Serikali za Mitaa,(TAMISEMI) Angellah Kairuki, wakati wa ufunguzi wa  kikao kazi cha mapitio ya tathimini ya utekelezaji wa shughuli za uboreshaji na usimamizi wa elimu kwa mwaka 2022 na mpango mwaka 2023.

Amesema hadi kufikia Januari 6, mwaka huu wanafunzi   65,786 wa darasa la awali wamekwisha andikishwa wakiwemo wavulana 32,543 na Wasichana 33,243 sawa na aslilimia 93.

Mwassa amesema lengo ni kuandikisha wanafunzi wa Darasa la Awali 70,872 wakiwemo wavulana 34,708 na wasichana 36164.

Kwa upande wa  Darasa la Kwanza amesema mkoa umeweka lengo kwa wanafunzi  wanaotarajiwa  kuandikishwa ni 78,846 wakiwemo wavulana 39,195 na wasichana 39,651.

Mkuu wa mkoa amesema hadi kufikia Januari 6, 2023  wanafunzi  walioandikishwa  ni 74,578 kati yao wavulana  37,342 na wasichana ni 37,578 sawa na asilimia 94.5.

“ Miongoni mwa wanafunzi hawa walioandikishwa wamo wenye mahitaji maalum na kazi  ya Uandikishaji inaendelea hadi Machi 31, mwaka huu “ amesema Mwassa

Mkuu wa mkoa pia ametumia fursa hiyo kuwataka wakuu wa shule na walimu wakuu kujenga kuboresha na kutunza miundombinu ya shule , kuhakikisha kila shule ina hati miliki ya kiwanja ilipojengwa shule na kkishindikana basi angalau hati miliki ya kimila

Pia amewataka kumaliza syllabus kwa wakati ili kutoa muda kwa wanafunzi kufanya marudi, kuwa  na majaribio ya mara kwa mara ndani ya shule nay ale yanayoshirikisha shule jirani.

Katika hatua nyingine  amesema mkoa huo ulipokea  Fedha kutoka Serikali Kuu kiasi Sh  bilioni  6.9  kwa ajili ya ujenzi wa vyumba vya madarasa 345 ili kuwapokea Wanafunzi wa Kidato cha Kwanza 2023.

“ Madarasa yaliyokamilika ni 336 na matatu yapo hatua za ukamilishaji ,  viti na meza tayari vipo kwenye madarasa hayo tayari kwa kupokea wanafunzi wanaoanza masomo” amesema Mwassa

Kwa upande wake  Waziri wa Nchi, Ofisi ya Rais ,Tawala za Mikoa na Serikali za Mitaa,(TAMISEMI) Angellah Kairuki, baada ya kupokea taarifa hiyo amewataka wakuu wa shule na walimu wakuu kuhakikisha watoto wanapokuwa  shuleni wanalindwa ili kuwaepusha kufanyiwa vitendo vya ukatili  dhidi yao .

Kairuki amesema walimu wanapokuwa shuleni wanajukumu kubwa la kuwalea wanafunzi ili waweze kufikia  viwango vya juu zaidi katika elimu yao.

“ Ni Imani yangu mtaendelea kufanya  hivyo na nina amni kwa uwezo wenu katika kuongoza shule vyema mtaweza kuyaafikia yote haya” amesema Waziri huyo.

Habari Zifananazo

Back to top button