Waliofaulu mtihani wa marudio watakiwa shuleni

OFISI ya Rais, Tawala za Mikoa na Serikali za Mitaa (TAMISEMI), kwa kushirikiana na Kamati za Uchaguzi wa Wanafunzi wa Kidato cha Kwanza katika mikoa husika, imekamilisha kuwapangia shule wanafunzi wote 2,096 waliofaulu mtihani wa marudio katika shule mbalimbali za sekondari.

Katibu Mkuu  Tamisemi, Profesa  Riziki Shemdoe  amesema  hayo  Januari 15, 2023  mjini Morogoro, wakati akizungumza na waandishi wa habari  juu ya  uchaguzi wa wanafunzi wa kujiunga na kidato cha kwanza mwaka 2023 kwa wanafunzi waliofanya mtihani wa marudio Desemba  21/22 mwaka  2022.

Amesema  baada ya kukamilika kwa maandalizi hayo,  wanawataka wanafunzi waliofaulu  kuripoti katika Shule walizopangiwa kuanzia  Janauri 16, mwaka huu, ili kuanza masomo  na wenzao.

Amesema Tamisemi ilipokea  matokeo ya mtihani huo, ambapo jumla ya wanafunzi 2,096 wakiwemo wavulana 1,073 na wasichana 1,023 sawa na asilimia 96.15 ya watahiniwa waliofanya mtihani wamepata sifa ya kuchaguliwa kujiunga kidato cha kwanza katika shule za sekondari za serikali.