Waliopanga kumuua Zelensky wakamatwa

KIEV, Ukraine – Maafisa wawili wa Usalama ambao walidaiwa kuwa sehemu ya njama ya kuwaua maafisa wakuu wa serikali na jeshi wamekamatwa, Idara ya Usalama ya Ukraine (SBU) imetangaza.

Shirika hilo, lilidai katika chapisho kwenye Telegram kwamba washukiwa hao wawili walikuwa wakipanga kumuua Rais wa Ukraine Vladimir Zelensky, mkuu wa SBU Vasily Malyuk, na mkuu wa ujasusi wa kitaifa, Kirill Budanov, miongoni mwa wengine.

Chombo cha habari cha Strana kimewatambua washukiwa hao kuwa ni mkuu wa Utawala wa Usalama wa Jimbo, Andrey Guk, na mwenzake, kwa jina la Derkach. Wote wawili wanasemekana kukamatwa kwa wakati mmoja siku ya Jumamosi.

SBU inasema watu hao walikuwa maajenti wa mtandao ambao inadai ulikuwa unaratibiwa kutoka Moscow, na walikuwa wakimfuatilia Zelensky na maafisa wengine wa serikali kwa nia ya kuratibu shambulio la kombora na shambulio la ndege isiyo na rubani ya kamikaze dhidi yao.

Guk alishutumiwa haswa kwa kukusanya na kusambaza habari za siri juu ya watu waliolindwa, pamoja na Zelensky.

Mauaji ya baadhi ya maafisa yaliripotiwa kufanyika kabla ya Pasaka ya Orthodox Mei 5, huku mauaji ya Zelensky yakidaiwa kupangwa kama “zawadi kwa Putin kabla ya kuapishwa” Jumanne, Malyuk alidai katika taarifa iliyonukuliwa na SBU.

Washukiwa hao wamefunguliwa mashtaka ya uhaini na kuandaa shambulizi la kigaidi na sasa wanakabiliwa na kifungo cha maisha jela.

Habari Zifananazo

Back to top button