Watakiwa kubuni usalama mifumo ya mitandao

TUME ya Tehama  nchini (ICTC), imesema  ni muhimu  sana vijana  kuwa wataalam pamoja  na  kufanya  bunifu katika maeneo  ya usalama wa mifumo ya mitandao  ili kuwa  na uchumi wa kidigatali wenye kuzalisha  kazi kwao na kufanya Tehama ichangie pato la Taifa.

Mkurugenzi Mkuu wa ICTC, Dk Nkundwe Mwasaga amesema hayo leo  Dar es Salaam wakati akifunga mafunzo  kwa vijana na wanawake wajasiriamali,  kuhusu  namna ya kujilinda pindi wanapokuwa wakifanya mambo mbalimbali ya mtandaoni.

Mafunzo hayo ya siku tatu yaliandaliwa na kuratibiwa na Baraza la Biashara la Afrika Mashariki (EABC) kwa udhamini wa Shirika la Kijerumani la Ushirikiano wa Kimataifa ( GIZ).

Dk Nkundwe amesema kimsingi  mitandao kwa kawaida  inatakiwa iwe na usalama pia kuhakikisha inaaminika kwa mtumiaji wa mwisho, hivyo wajikite kuwa  wabunifu katika eneo hilo, jambo litakalosaidia kukua kwa uchimi wa kidigitali na kusaidia  kuaminika  pia.

“Vijana waoneshe uwezo mkubwa utakaosaidia mifumo kuwa salama, ili watu watakapokuwa wakifanya biashara zao ziweze kuwa salama bila kupoteza vitu vyao na zaidi waweze kuaminika,” amesema Dk Nkundwe.

Amesema mafunzo yaliyotolewa na EABC yanatakiwa kuwa  mengi haswa kwa kuwa  nchi  inajenga uchumi wa kidigitali mkubwa, ambao una nguzo moja ya msingi  inayoelezea mifumo iwe salama na iaminike.

Amesema katika kuhakikisha mifumo inakuwa salama  serikali  imetunga sheria mbalimbali ikiwemo ya  ulinzi wa taarifa binafsi za watu, makosa ya kimtandao ni yapi zote hizo kwa pamoja zikiwa na lengo la kuhakikisha usalama wa mifumo ya kimtandao.

Kwa upande wake Mtendaji  Mkuu wa EABC, John Kalisa amewataka vijana kufanya kazi kwa bidii kuwezesha mifumo ya kimtandao inakuwa salama kwa kuwa ni eneo linaloweza kuwainua kwa kuwapa ajira.

Ametolea mfano nchini Uganda kuwa asilimia 38 ya biashara zilizomo zinaendeshwa na vijana hivyo wajikite kufanya kazi kwa bidii kuwa na kampuni kubwa zinazoweza kutengeneza mifumo ya kutoa ulinzi wa mitandao.

Amesema majukwaa ya mafunzo kama hayo kwa vijana ni eneo linalozalisha ubunifu, wakifanya kazi kwa pamoja kwa ajili ya kukuza uchumi wa kidigitali.