Watakiwa kuendesha kilimo mseto

WAKULIMA wameshauriwa kuendesha kilimo mseto cha mchanganyiko wa mazao ya chakula na ufugaji nyuki, kwa uhakika wa mavuno ya kutosha na yaliyo bora.

Wito huo umetolewa leo na wataalamu wa ufugaji nyuki wa Wakala wa Misitu nchini (TFS), wakisema uhakika wa mazao ni kwa sababu  nyuki wanasaidia kuchavusha mazao kwa wingi, huku nyuki wakipata chakula cha kutosha kuzalisha asali kutoka katika maua ya mazao hayo.

“Tafiti zinaonesha kwamba nyuki anapotua kwenye mmea kutafuta chakula anafanya uchavushaji mkubwa unaosaidia upatikanaji wa mazao mengi ya shambani,” amesema Mhifadhi wa TFS Wilaya ya Butiama, Hafidhi Said.

Amesema chakula anachopata nyuki kwenye mmea huo anaochavusha kinasaidia uzalishaji mkubwa wa mazao ya nyuki, hasa asali na nta.

Amesema  kilimo hicho kinapaswa kufanyika jirani na misitu ya hifadhi, kwani ndiyo maeneo salama kwa mujibu wa taratibu  zinazoelekeza nyuki kufugwa kilometa takribani sita kutoka kwenye makazi ya watu, ili kuepusha madhara  yanayoweza kusababishwa na nyuki kwa binadamu au mifugo.

Akifafanua zaidi, amesema kilimo mseto kinasaidia uzalishaji wa mazao ya nyuki kuwa mkubwa, kwani kinawapungizia nyuki safari ya kwenda kutafuta chakula mbali.

“Kawaida nyuki husafiri hata kilometa sita kutafuta chakula, hivyo kilimo mseto kitamsogezea chakula karibu na  kumpatia muda mwingi wa kufanya uzalishaji katika mzinga,” amesistiza.

Habari Zifananazo

Back to top button