Waziri Aweso atoa maagizo maji safi

WAZIRI wa Maji, Jumaa Aweso, amewataka  Wakurugenzi Watendaji wa Mamlaka za Maji safi na Usafi wa Mazingira nchini, kushughulika na changamoto za wananchi  kuhusu upatikanaji wa huduma bora za maji safi.

Aweso amesema hayo leo Septemba 21, 2022, wakati akifunga kikao kazi cha Wakurugenzi Watendaji wa Mamlaka za Maji nchini mjini Morogoro.

Waziri Aweso amesema serikali imelenga kuhakikisha hali ya upatikanaji wa maji safi na salama kwa Watanzania wote, inafikia asilimia 95, ifikapo mwaka 2025.

Aweso amesema kufikia lengo hilo la serikali, miradi mbalimbali  ya maji inatekelezwa katika kila jimbo nchini na ile ya programu ya Covid-19, ambapo  tayari mamlaka za maji nyingi zimeweza kukamilisha ujenzi wa miradi ya maji safi.

Hivyo amezielekeza mamlaka  zile  ambao  hazijakamilisha  miradi yao wakamilishe kwa haraka.

Waziri Aweso amewataka kwenda kutatua changamoto za upatikanaji wa huduma za maji safi, kuboresha hali ya usafi wa mazingira pamoja na utunzaji wa vyanzo vya maji.

“Ninawaelekeza kutumia fursa hii vizuri kwa ajili ya  kuongeza upatikanaji wa huduma za maji safi na  kuboresha huduma ya maji taka katika maeneo tunayoyahudumia,” amesema Aweso.