Majaliwa ataka wananchi kupewa muda

WAZIRI Mkuu Kassim Majaliwa ameagiza wananchi kupewa  muda wa kumalizia shughuli zao za Kilimo kabla ya kuondolewa katika eneo maalum lililotengwa kujengwa mabwawa na skimu za kisasa Mbarari mkoani Mbeya.

Majaliwa ametoa agizo hilo leo Januari 17,2023 katika ziara yake na kamati ya mawaziri nane wa kisekta na Wananchi wa eneo la Kapunga-Mbarali Mbeya.

Amesema,  Wizara ya Kilimo inapaswa  kuhakikisha  inawapanga wakulima vizuri na kuweka miundombinu ya umwagiliaji ili wakulima waweze kufanya kilimo cha uhakika.

Awali, akizungumza katika ziara hiyo, Naibu Waziri wa Kilimo, Anthony Mavunde alisema  serikali kupitia Wizara ya Kilimo inatarajia kujenga  mabwawa makubwa sita na Skimu za umwagiliaji za kisasa nane  kwenye eneo la ekari 91,231 lililotengwa kwa ajili ya kilimo Wilayani Mbarali,mkoani Mbeya.

Alisema, lengo ni kukuza Sekta ya Kilimo kwa asilima 10 ifikapo mwaka 2030.

Alimesema  baada ya maboresho ya Mpaka wenye tangazo la serikali GN 28 ya kuangalia upya mipaka yake ambayo itaenda kutengeneza eneo la zaidi ya ekari 91,231 kwajili ya Kilimo,   Wizara  itakuwa na kazi ya kuwapanga wakulima vizuri kwenye maeneo hayo na kujenga Mabwawa na skimu za kisasa

Pia,  ujenzi wa miundombinu hiyo ya Kilimo cha umwagiliaji itasaidia kuwa maji yanarudi mtoni kwenye njia yake ya asili na hivyo kuchangia katika uwekezaji mkubwa wa mradi wa kufua umeme wa Bwawa La Nyerere

Aidha, amesema hatua inayofuata ni uwekaji wa  miundombini rafiki kwajili ya Mifugo katika Mabwawa 14  nchini, ambayo mabwawa hayo yatakuwa na uwezo wa kuhifadhi maji Lita  za ujazo 131, 535,000, na kuondoa adha ya mifugo kukosa maji hivyo kutatua migogoro ya wakulima na wafugaji nchini.

Naye Waziri wa Ardhi Dkt. Angeline Mabula ambaye  alisema kuwa serikali itachukua hatua za makusudi za kupima maeneo hayo na kuwapatia hati miliki wananchi hao kwa mujibu wa sheria ya ardhi ili kupunguza migogoro isiyo ya lazima.