Mtangazaji Misri ahukumiwa kifo

MISRI: Mtangazaji wa televisheni nchini Misri, Sarah Khalifa, ni miongoni mwa watu 12 waliohukumiwa adhabu ya kunyongwa kutokana na kuhusika katika mtandao wa biashara ya dawa za kulevya.

Kwa mujibu wa gazeti la serikali la Al-Ahram, Mahakama ya Jinai ya Cairo Jumamosi iliwahukumu washtakiwa hao 12 kunyongwa na kuwatoza faini ya pauni za Misri 500,000, sawa na takribani dola za Marekani 9,800 kila mmoja.

Washtakiwa hao walituhumiwa kuunda genge la uhalifu lililojihusisha na kuagiza bidhaa zinazotumika kutengeneza dawa za kulevya kwa ajili ya biashara, pamoja na kumiliki silaha za moto bila leseni.

Mbali na hukumu hiyo, watu wengine tisa walihukumiwa kifungo cha maisha, huku washtakiwa saba wakiwa wameachiwa huru baada ya mahakama kuwakuta hawana hatia.