‘Wakitoa ndege kicheko, wanahoji mkataba wa jezi ooh tutafungiwa’

DAR ES SALAAM; Wadau wa michezo nchini wametakiwa kusubiri ripoti ya Kamati ya Uchunguzi itakayoundwa na Waziri wa Habari, Utamaduni, Sanaa na Michezo, Paul Makonda, kuhusu mkataba wa jezi za timu za Taifa, badala ya kuanza kuzua taharuki kwamba hatua hiyo ni kuingilia shughuli za uendeshaji mpira wa miguu.

Akizungumza na DailyNews Digital, kiongozi wa zamani wa mpira wa miguu, Ismail Abdallah, amesema anaamini serikali ina nia njema na jambo hilo, kama inavyokuwa na nia njema wakati wa matukio mengine yanayohusu timu za Taifa.

“Serikali ikitoa ndege kusafirisha wachezaji wa Taifa Stars, Simba au Yanga tunafurahia na kuunga mkono, leo serikali inataka iunde kamati kuchunguza kuhusu mkataba wa jezi baina ya TFF (Shirikisho la Mpira wa Miguu Tanzania na mzabuni zimeanza kelele kwamba tutafungiwa.

“Yaani leo ndiyo zinaibuka habari kwamba kuna kifungu cha katiba ya Fifa kinataka wanachama kusimamia mambo yao kwa uhuru bila kuingiliwa na maofisa wa serikali?

“Tutulie waziri amesema ataunda kamati, hiyo ndiyo itakuja na majibu, tuache kuwa na hofu na kuanza kutishia kwamba tutafungiwa, hakuna kitu hicho cha kufungiwa,” amesema mdau huyo.

Jana wizara ilitoa taarifa ikieleza kuwa Waziri Makonda anakusudia kuunda kamati ya kuchunguza mkataba wa mzabuni wa jezi za timu za taifa ili kubaini manufaa ya mkataba huo.

Taarifa hiyo pia ilieleza kuwa Waziri Makonda hatambui matangazo ya jezi mpya za timu za taifa kutokana na mchakato wa kuzibadilisha kutohusisha wizara, licha ya maelekezo aliyoyatoa Februari 2026 ya kuboreshwa jezi za timu za taifa, ili ziakisi manufaa mapana kwa nchi, ikizingatiwa serikali inatumia fedha nyingi katika maandalizi ya timu zinazoshiriki mashindano ya kimataifa.