Chalamila ataka wadau wafunze vijana umuhimu wa amani

MKUU wa Mkoa wa Dar es Salaam, Albert Chalamila amewataka wadau na jamii kuendelea kutoa elimu kwa vijana hasa walio kwenye makundi ya waendesha pikipiki (bodaboda) na bajaji juu ya umuhimu wa kulinda na kudumisha amani jijini humo.

Kauli hiyo ya Chalamila imekuja siku chache baada ya kundi la vijana kufanya vurugu na kuharibu mali binafsi na za serikali katika mikoa mbalimbali nchini siku ya Uchaguzi Mkuu Oktoba 29, mwaka huu.

Alisema Jiji la Dar es Salaam linahudumia nchi nyingi zisizo na bandari na lina shughuli nyingi za biashara, afya na uchumi, hivyo amani ni nguzo muhimu katika ustawi wake.

“Jamii iendelee kutoa elimu kwa vijana wetu hawa waelewe umuhimu wa amani na namna ya kuidumisha,” alisema.

Chalamila aliyasema hayo juzi alipokutana na wadau wa sekta ya nishati ya mafuta ya dizeli na petroli katika kikao maalumu kilichoratibiwa na Mamlaka ya Udhibiti wa Huduma za Nishati na Maji (EWURA) Ubungo, Dar es Salaam.

Miongoni mwa waathirika wa vurugu za Oktoba 29 ni wamiliki wa vituo vya mafuta ambavyo vingi viliteketezwa na moto, taarifa zinasema takribani vituo 41 nchi nzima viliteketezwa kwa moto.

Katika kikao hiko, yalifanyika majadiliano ya kina kuhusu suala la ulinzi na usalama wa vituo vya mafuta kufuatia matukio hayo ya uhalifu.

Aidha, Chalamila alitoa pole kwa wafanyabiashara hao akisisitiza kuwa serikali itaendelea kuwa bega kwa bega nao kutokana na mchango mkubwa wanaotoa katika uchumi wa taifa na katika maisha ya wananchi mmoja mmoja.