Dk. Mwinyi asifu mafanikio ya uchumi shirikishi

RAIS wa Zanzibar na Mwenyekiti wa Baraza la Mapinduzi, Dk. Hussein Ali Mwinyi, amesema mageuzi ya uchumi na fedha yaliyotekelezwa na Serikali yamekuwa msingi imara wa kuijenga Zanzibar shirikishi na yenye ustawi wa wananchi wote.

Akizungumza katika hafla maalum ya kumpongeza kwa mageuzi ya uchumi na fedha, utoaji wa gawio kwa wawekezaji wa Zanzibar Sukuk, na uzinduzi wa Skimu ya Hifadhi ya Jamii ya Kiislamu, hafla iliyofanyika katika Viwanja vya Ikulu Zanzibar, Dk. Mwinyi amesema Serikali imepiga hatua kubwa katika kuimarisha uchumi wa taifa na kuboresha maisha ya wananchi.

Rais Dk. Mwinyi alisema kuwa mafanikio hayo yametokana na sera madhubuti za kifedha, usimamizi bora wa fedha za umma, na matumizi ya teknolojia za kisasa, hali iliyochochea ukuaji wa uchumi kwa asilimia 7.2 na ongezeko la uwekezaji wa ndani na nje ya nchi.

Alifafanua kuwa ndani ya kipindi cha miaka mitano, mapato ya Serikali yameongezeka kwa asilimia 278, huku mfumuko wa bei ukidhibitiwa kwa tarakimu moja. Aidha, sekta za utalii, kilimo na uvuvi zimeendelea kukua na kuimarika kwa kasi, zikichangia kwa kiasi kikubwa katika pato la taifa.

Rais Dk. Mwinyi alieleza kuwa hatua ya kutoa gawio la kwanza kwa wawekezaji wa Zanzibar Sukuk, tangu kuanzishwa mwaka 2024, ni ishara ya wazi ya dhamira ya Serikali kusimamia vyema dhamana zake za kifedha. Kupitia mpango wa Sukuk, Serikali imeweza kugharamia miradi mikubwa ya kimkakati, kuimarisha imani kwa wawekezaji na kufungua milango kwa sekta binafsi kushiriki kikamilifu katika maendeleo ya taifa.

Alisisitiza kuwa mageuzi hayo yametekelezwa chini ya misingi ya uwazi, uwajibikaji na uadilifu, huku Zanzibar ikiweka historia mpya katika utekelezaji wa mifumo ya kifedha inayoendana na kanuni za Kiislamu. Aidha, Rais Dk. Mwinyi alisema Serikali imeanzisha mfumo wa bima ya Kiislamu kupitia Shirika la Bima la Zanzibar (ZIC), utakaotoa huduma zinazofuata misingi ya sheria za Kiislamu.

Aliongeza kuwa mageuzi katika mifuko ya hifadhi ya jamii yameboresha ulipaji wa pensheni kwa wakati, usimamizi wa michango, na kuongeza faida kwa wanachama. SOMA: Rais Mwinyi : Kampeni za CCM zinaonesha taswira ya ushindi

Kupitia mifumo ya kidijitali, Serikali inalenga kuhakikisha kila mfanyakazi wa umma na sekta binafsi anasajiliwa na kulindwa dhidi ya changamoto za kiuchumi, maradhi, ajali na uzee hatua itakayojenga Zanzibar yenye haki, usawa na ustawi wa jamii.