FCC yawavuta wawekezaji IATF

ALGIERS, ALGERIA: Tanzania imejipambanua kama nchi salama na yenye ushindani katika kuvutia uwekezaji kwenye Maonesho ya Biashara ya Kimataifa Barani Afrika (Intra African Trade Fair – IATF) yanayoendela jijini Algiers, Algeria.

Maonesho hayo yaliyoanza Septemba 4 yanawakutanisha wawekezaji na wafanyabiashara kutoka mataifa mbalimbali ya Afrika kujadili ushirikiano na fursa za biashara.

Katika maonesho hayo, Tume ya Ushindani (FCC) inatoa elimu kuhusu ushindani na ushajishaji wa uchumi kwenye soko nchini Tanzania.
Mkuu wa Kitengo cha Mawasiliano na Uhusiano wa Umma wa FCC, Roberta Feruzi, alisema jukumu lao ni kuwaeleza wawekezaji kuwa Tanzania ni soko salama na lenye uwazi na ushindani wa haki.

SOMA: Balozi, bosi Sonatrach wateta fursa za uwekezaji sekta ya mafuta, gesi asilia 

“Tunatoa miongozo kwa wadau wanaotaka kushirikiana na kampuni za ndani katika kununua au kuungana kibiashara na tunarahisisha mchakato mzima,” alisema.

“Kupitia ushiriki wake, Tanzania inalenga kutumia IATF kama jukwaa la kutangaza fursa, kuimarisha urahisi wa uwekezaji na kufungua milango ya ushirikiano wa kibiashara barani Afrika.”

Naibu Katibu Mkuu wa Wizara ya Viwanda na Biashara, Dkt. Suleiman Serera, anaongoza ujumbe wa Tanzania. Akiwa na Balozi wa Tanzania nchini Algeria, Iman Njalikai, wametembelea Banda la Tanzania na kujadiliana na wawekezaji kuhusu fursa zilizopo nchini.

Taasisi nyingine zinazoshiriki ni pamoja na NEMC, TANTRADE, TMDA. TISEZA, PURA, TFS na ZIPA.

Kupitia maonesho hayo, Balozi wa Tanzania nchini Algeria, Iman Njalikai alikutana na kufanya mazungumzo na mwenyekiti na mkurugenzi mtendaji wa Kampuni ya Taifa ya Mafuta ya Algeria (Sonatrach), Rachid Hachichi kwa lengo la kujadili namna gani pande hizo mbili zinaweza kushirikiana katika sekta ndogo ya mafuta na gesi asilia.

Kupitia mkutano huo uliofanyika jijini Algiers Jumapili (Septemba 7, 2025) na kuwaleta pamoja viongozi na maafisa waandamizi kutoka Mamlaka ya Udhibiti Mkondo wa Juu wa Petroli (PURA) pamoja na wale wa Sonatrach, nchi hizo mbili  pia ziliangazia fursa mbalimbali za uwekezaji katika sekta hiyo muhimu kwa uchumi wa nchi hizo mbili za Afrika.

Mazungumzo hayo yalifanyika Septemba 07, 2025 Jijini Algeris, Algeria na kuhudhuriwa na viongozi wa juu wa Sonatrach na ujumbe wa watanzania uliojumuisha viongozi na maafisa waandamizi kutoka Mamlaka ya Udhibiti Mkondo wa Juu wa Petroli (PURA)