Mjumbe INEC ataka uadilifu uchaguzi mkuu

MOROGORO: WASIMAMIZI na wasaidizi wa vituo vya kupigia kura wametakiwa kutekeleza majukumu yao kwa uadilifu, uaminifu na uzalendo ili kuhakikisha uchaguzi unafanyika kwa haki, amani na uwazi.

Mjumbe wa Tume Huru ya Taifa ya Uchaguzi (INEC), Jaji Asina Omari, ametoa wito huo alipozugumza  na wasimamizi hao kwenye mafunzo katika Kituo cha  Tarafa ya Mvomero, ambayo yalifanyika kwenye ukumbi wa Shule ya Sekondari ya Sokoine Memorial, wilayani Mvomero.

Mafunzo hayo yaliyoanza  Oktoba 26 hari 27, mwaka huu katika vituo vya tarafa ya Mvomero, Mlali na Turiani wilayani humo.

Jaji Asina amesema INEC imeweka utaratibu na miongozo kuhakikisha kila hatua ya mchakato wa uchaguzi inazingatia sheria, kanuni na maadili ya uchaguzi, hivyo ni wajibu wa kila msimamizi kuhakikisha anasimamia kwa weledi bila upendeleo.

Hiivyo amewataka kuhakikisha kuwa wanazingatia suala la muda wa  kufungua vituo na kufunga vituo vya kupiga kura akisisitiza kuwa kuwahi kwao kutaondoa malalamiko.

Mbali na hayo ,Jaji Asina amepata fursa ya kukagua baadhi ya vituo wazi vya kupigia kura katika kata ya Dakawa kikiwemo kituo cha Ofisi ya Serikali ya kijiji cha Dakawa.

Kwa upande wake Msimamizi wa Uchaguzi Jimbo la Mvomero, Mary Kayowa akiwa katika kituo cha Tarafa ya Mlali kuangalia utoaji wa mafunzo kwa wasimamizi hayo amewakumbusha wote kutunza siri , nidhamu, uadilifu na weledi katika utendaji wao kwani ni nguzo kuu za kuhakikisha uchaguzi wa amani na wa haki.

Amewataka kutekeleza majukumu yao kwa kufuata maelekezo yote ya Tume  Huru ya Taifa ya Uchaguzi ili kuhakikisha wananchi wanapata haki yao ya kidemokrasia ya kuchagua viongozi wanaowataka.

Kayowa amewataka wakahikishe  wanawapa kipaumbele watu wenye mahitaji maalumu wakiwemo wenye ulemavu, wanawake wajawazito, wenye watoto wachanga na wazee .

Amesema kwa wale wenzetu ambao hawaoni kutakuwa na matumizi ya nukta nundu kwa ambao wanaweza kuzitumia kutakuwa na karatasi hizo na wataweza kutumia ili kupiga kura vizuri ikiwemo na matumizi vitotori ambavyo ni rafiki kwa watu wote kwa ambao sio walemavu na wenye ulemavu.

Naye ,Msimamizi wa Kituo, Jamila Seif  ambaye ni miongoni mwa walipatiwa mafunzo hayo  amesema watakwenda  kusimamia uchaguzi huo na kwamba utakuwa huru na haki kwa watanzania wote kutokana na kujengewa uwezo na  uwelewa wakutosha katika kuwezesha  kuifanya kazi hiyo kwa mujibu wa sheria , kanuni na miongozo ya Tume  Huru ya Taifa ya Uchaguzi.

Uchaguzi Mkuu  wa Rais, wabunge na madiwani utafanyika Oktoba 29, 2025  ambao umebeba  kauli mbinu “Kura yako Haki yako, Jitokeze Kupiga Kura” ambapo watanzania watajitokeza kuchagua viongozi wao watakao waletea maendeleo kwa kipindi cha miaka mitano ijayo.