Ngajilo aahidi kushughulikia kero ya barabara na mfereji Isakalilo

Mgombea ubunge wa Jimbo la Iringa Mjini, Fadhili Ngajilo (CCM), amesema kero kubwa inayowakabili wananchi wa Kata ya Isakalilo, hususan eneo la Mkoga, ni ubovu wa barabara ya Mkoga–Mgera yenye urefu wa kilometa 5.42, akiahidi kusimamia ujenzi wake mara baada ya kuchaguliwa.

Akihutubia wananchi wa kata hiyo leo, amesema barabara hiyo ni kiungo muhimu kitakachorahisisha usafirishaji wa mazao na bidhaa, hivyo kufungua milango ya biashara na kuinua uchumi wa wananchi wa eneo hilo.

Amesema pia serikali itashughulikia uboreshaji wa mfereji wa Mkoga, ili kuimarisha kilimo cha umwagiliaji kinachoajiri wananchi wengi wa kata hiyo.

Pamoja na sekta ya kilimo, alisema masuala ya afya, elimu, maji na umeme yatapewa kipaumbele maalum.

Aliahidi pia kuimarisha vikundi vya kuweka na kukopa, pamoja na kuwawezesha wajasiriamali wadogo kupata mikopo na vifaa vya kufanyia kazi kama vile vifaa vya kufugia nyuki na kutengeneza sabuni.

Kwa upande wake, mgombea udiwani wa Kata ya Isakalilo, Emanuel Mketo, amesema maendeleo ya mfereji huo ndiyo yalimvutia kugombea nafasi hiyo.

Amesema baada ya uchaguzi, atakaa pamoja na wananchi kupanga mikakati ya pamoja ya kuimarisha huduma za kijamii na kuibua fursa za uwekezaji katika kata hiyo yenye ardhi na mazingira rafiki kwa maendeleo ya kiuchumi.