Tanzania yaandikisha wanachama wengi bima ya afya

TANZANIA, Kenya na Rwanda ni miongoni mwa nchi wanachama wa Jumuiya ya Afrika Mashariki (EAC) zilizoandikisha wanachama wengi kupata huduma za matibabu kupitia bima ya afya.

Aidha Bunge la Jumuiya ya Afrika Mashariki (EALA) limeridhia azimio la kulitaka Baraza la Mawaziri wa nchi wanachama wa jumuiya hiyo kuharakisha mchakato wa kuwa na bima ya afya kwa wote ili watu wawe na afya njema.

Akiwasilisha hoja hiyo kwenye mkutano wa nne wa Bunge la tano, mbunge wa Eala kutoka Rwanda, Balozi Fatma Ndangiza amesema katika kuhakikisha suala la afya linaimarika Tanzania, Kenya na Rwanda ni nchi za mfano kwa kuwa na hamasa ya watu kujiunga na bima ya afya ili wapate huduma za matibabu.

Amesema wabunge hao wamepitisha azimio hilo kuharakisha mchakato wa kuwa na huduma ya bima ya afya kwa wote kwa kuwezesha nchi wanachama kutenga bajeti ya asilimia 15 ili kufikia malengo ya umoja huo.

“Ni wakati sahihi wa kupata majibu ya uhakika ya mkakati wa kuachana na utegemezi wa misaada kutoka nchi za Ulaya na badala yake kufanya uwekezaji wa kutosha ili kuendana na uhitaji uliopo hususan katika sekta ya afya kwani tunatakiwa kuhakikisha afya inakuwa haki ya msingi kwa kila raia, maana afya ni utajiri,” amesema.