Wagombea udiwani 124 CCM wakosa upinzani Arusha  

ARUSHA; MSIMAMIZI wa Uchaguzi Mkoa wa Arusha, Apolinary Seiya amesema wagombea wa udiwani kupitia Chama Cha Mapinduzi (CCM) katika kata 124 kwenye mkoa huo hawana wapinzani.

Seiya amesema Tume Huru ya Taifa ya Uchaguzi (INEC) imepitisha wagombea udiwani katika kata zote 160 za Mkoa wa Arusha.

Alisema mkoa huo una majimbo saba ya uchaguzi na katika kata 36 zilizobaki vyama vya upinzani vimeweka wagombea.

Seiya alisema katika Jimbo la Ngorongoro lenye kata 30, CCM wagombea 28 wa CCM hawana wapinzani.

Alisema katika kata za Oldonyisambu na Sale, Chama cha ACT Wazalendo kimeweka wagombea. Nao ni Kabaney Mojah wa kata ya Oldonyosambu na Mussa Radia wa Sale.

Seiya alisema katika Jimbo la Longido lenye kata 20, INEC imeteua wagombea 20 na wote ni wa CCM.

Alisema katika Jimbo la Monduli lenye kata 20, tume imeteua wagombea 20 na wote ni wa CCM.

Alisema katika Jimbo la Arumeru Mashariki lenye kata 35, imeteua wagombea wa kata 20 wa CCM wasio na wapinzani na kati ya kata 15, vyama vya upinzani vimeweka wagombea.

Seiya alisema katika jimbo la Arusha Mjini wagombea udiwani wa CCM kutoka katika kata tisa kati ya 25 hawana wapinzani.

Alisema katika Jimbo la Karatu, wagombea kupitia CCM katika kata 14 kati ya 22 hawana wapinzani.

Seiya alisema kwenye Jimbo la Arumeru Magharibi, wameteuliwa wagombea 13 wa CCM na hawana wapinzani.