‘Wanandoa jengeni tabia mtoke pamoja’
DAR ES SALAAM; Wanandoa wameshauriwa kujenga tabia ya kuwa na mitoko ya pamoja ili kufahamu matamanio, ladha za chakula, mitindo ya mavazi, nyimbo na mambo mengine yanayomfurahisha mwenza wao, hatua itakayosaidia kudumisha ndoa na kuimarisha mshikamano wa kifamilia.
Ushauri huo umetolewa na mwimbaji wa nyimbo za Injili Dk Christine Mbelwa, mwandaaji wa Usiku wa Wanandoa chini ya The Pinnacle of Mentorship & Excellence Award (PIMEA), akieleza kuwa tukio hilo limekuwa jukwaa la kujenga, kuponya na kuokoa ndoa kwa zaidi ya miaka 10 sasa.
“Ndoa bora ni ushirikiano, siyo mashindano. Moja ya majukumu tuliyopewa mimi na mume wangu ni kujenga ndoa imara kupitia semina, makongamano, vitabu na mafundisho mbalimbali,” amesema Dk Mbelwa.
Amesema Usiku wa Wanandoa huwakutanisha wanandoa kwa ajili ya mafundisho ya vitendo, maswali na majibu ya moja kwa moja, michezo, burudani na vinywaji vinavyosaidia kuongeza furaha na uponyaji wa kihisia.
Kwa mujibu wa Dk Mbelwa lengo ni kuimarisha afya ya ndoa na familia kwa ujumla, huku akisisitiza kuwa kwa zaidi ya miaka kumi wamekuwa wakishuhudia migogoro ya kifamilia ikipungua na ndoa nyingi zikirejea katika mshikamano na heshima.
Ametaja sababu kuu za migogoro ya ndoa kuwa ni mawasiliano duni kati ya wanandoa, changamoto za kifedha na mipango isiyo wazi, ukosefu wa uaminifu na uvunjaji wa makubaliano.
“Mara nyingi matatizo haya huanza kidogo, lakini yakiachwa hukua na kusababisha mgawanyiko mkubwa. Hata hivyo, tunaamini kupitia mafunzo, ushirikiano na sala, ndoa nyingi zinaweza kuponywa,” amesema.
Kuhusu kwa nini ndoa hazidumu amesema ni pamoja nak maandalizi ya kiroho, kifamilia na kisaikolojia kabla ya ndoa, kukimbia matatizo badala ya kuyashughulikia, ukosefu wa elimu ya ndoa na hofu ya Mungu, mmomonyoko wa maadili na tabia zisizojenga.
