Uchaguzi Mkuu 2025 kielelezo cha demokrasia EAC

HIKI ni kipindi ambacho baadhi ya nchi za Jumuiya ya Afrika Mashariki (EAC) zitafanya Uchaguzi Mkuu kwa ajili ya kupata serikali mpya kwa miaka mitano ijayo.

Tanzania inatarajia kufanya Uchaguzi Mkuu Oktoba 29, 2025 huku Uganda, Burundi na Kenya zikitarajiwa kufanya uchaguzi mwaka 2026 na 2027.

Uchaguzi huu wa Tanzania unatoa somo kwa nchi zote za Afrika Mashariki katika maeneo mengi. Kwanza, ni idadi ya vyama vinavyoshiriki katika uchaguzi.

Katika uchaguzi huu kuna vyama 18 vinavyoshiriki kati ya vyama 19 vilivyosajiliwa na Ofisi ya Msajili wa Vyama vya Siasa. Hii ni idadi kubwa ikilinganishwa na miaka iliyopita.

SOMA: KUELEKEA UCHAGUZI MKUU 2025: Kataa siasa za uchochezi, hoja za chuki

Kwa mfano, katika Uchaguzi wa 1995, kati ya vyama 13 vilivyosajiliwa ni vyama vinne vilishiriki na kutoa mgombea wa kiti cha urais. Hii ni kwa mujibu wa Tathimini ya Uchaguzi Mkuu wa Tanzania 1995 ya mwaka 1996.

Ni dhahiri kuwa ushiriki wa vyama unaendelea kuongezeka hali inayodhihirisha ukuaji mkubwa wa
demokrasia Tanzania.

Tunaamini hali hii inaakisi ukuaji wa maendeleo ya kidemokrasia katika chaguzi zijazo kwa nchi wanachama wa EAC hususani Uganda, Burundi na Kenya ambazo uchaguzi wao unafuata baada ya Tanzania.

Kwa kuwa EAC ina ndoto za kuwa Shirikisho la Afrika Mashariki, maendeleo haya ya kidemokrasia tunayoyaona Tanzania ni habari njema kwa shirikisho hilo.

Maana ili liundwe, panahitajika mizani sawa ya kisiasa katika maeneo mbalimbali ikiwa ni pamoja na uwepo wa demokrasia katika nchi wanachama.

Ni mategemeo yetu kuwa hata uchaguzi wa Uganda utakapowadia, tutaona ushiriki mkubwa wa vyama vya siasa na wanasiasa.

Tunajivunia demokrasia iliyooneshwa na Tanzania na ambayo inastahili kuigwa na nchi zote za ukanda.

Tunashauri maendeleo ya kidemokrasia ambayo yanaonekana kwa Tanzania yataliwa kielelezo kwa nchi zote za Afrika Mashariki na yatafungua milango ya uundwaji wa Shirikisho la Kisiasa la Afrika Mashariki.

Mbali na demokrasia, Tanzania imekuwa kielelezo kizuri kutokana na michakato ya uchaguzi kuwa ya amani na utulivu.

Hata sasa vyama mbalimbali vinavyoshiriki vinaendelea kuimba amani na utulivu kila kona hali inayoashiria kuwa mpaka siku ya uchaguzi, hali itakuwa ya amani na utulivu.

Kadhalika, mshikamano wa kitaifa ni somo tosha linalotolewa na Tanzania wakati huu wa uchaguzi kwa sababu baadhi ya nchi wakati kama huu hugawanyika vipande na kufanya kuwa vigumu kuunganisha taifa baada ya uchaguzi.