Bandari Zanzibar mabingwa wapya wa soka ‘interpplort games 2025’

TIMU ya soka ya Shirika la Bandari Zanzibar (ZPC),imetwaa ubingwa wa Michezo ya 18 ya Mamlaka ya Usimamizi wa Bandari Tanzania (TPA) “InterPort Games 2025” kwa mara ya kwanza kwa kuifunga Dar es Salaam Port kwa bao 1-0 katika mchezo wa fainali uliofanyika uwanja wa Jamhuri Morogoro

Katika miaka 18 ya mashindano hayo, Shirika la Bandari Zanzibar limeshiriki mara 16 na timu hiyp ilifanikiwa kucheza fainali mara mbili kwa miaka tofauti na kuambulia nafasi ya pili.

Bao hilo lililowapa ubingwa wa mara ya kwanza tangu kushiriki mashindano hayo lilipachikwa kwa mkwaju wa penati na mchezaji Mohammed Kombo Juma kwenye kipindi cha pili cha mchezo ambao ululichezeshwa kwa dakika 60.

Mlinzi wa timu hiyo ,Mohammed Makame Kibanda alishukuru kwa kumaliza mchezo wa fainali kwa usalama na kueleza kuwa siri ya ushindi huo ulitokana na wachezaji kufuata maelekezo ya mwalimu wao.

“Mchezo ulikuwa wenye ushindani mkubwa , kutokana na kuyafanyia kazi maelekezo ya mwalimu wetu tumepata ushindi wa kutwaa taji , hii ni mara ya kwanza kutwaa kombe ingawa misimu mwili mfufulizo tumecheza fainali ila hatukufanikiwa kuchukua kombe , isipo kuwa msimu huu Mungu ametujalia tumechukua kombe” alisema Kibanda.

Timu zingine zilizotwaa ubingwa katika mchezo wa Netiboli ni Shirika la Bandari Zanzibar, Bandari ya Tanga ikinyakua mchezo wa mpira wa kikapu ,Bandari ya Dar es Salaam ikitwaa ubingwa wa mpira wa wavu kwa upande wa wanaume na wanawake pamoja na kutwaa ushidni wa jumla.

Akizungumza kwa niaba ya Mkurugenzi Mkuu wa TPA, Wakili Plasduce Mbossa, Mkurugenzi wa Rasilimali Watu na Utawala ambaye pia ni Mwenyekiti wa Kamati ya Mashindano, Mbarikiwa Masinga, aliipongeza kamati ya maandalizi, waamuzi na washiriki wote kwa nidhamu na moyo wa kushindana waliouonyesha katika kipindi chote cha mashindano.

Katika ujumbe wake, Wakili Mbossa alisisitiza kuwa michezo hiyo ni zaidi ya ushindani, kwani huimarisha afya, mshikamano na utayari wa watumishi katika kutekeleza majukumu yao kwa weledi na ufanisi mahala pa kazi.

Licha ya hayo aliwataka watumishi wote wa TPA na sekta ya bandari kwa ujumla kushiriki kikamilifu katika zoezi la kupiga kura Oktoba 29, 2025, akieleza kuwa ni wajibu wa kila mtumishi na raia kushiriki katika mchakato huo wa kidemokrasia kwa amani na utulivu.

Michezo hiyo ilianza Oktoba 22 hadi 24, mwaka huu na ilishirikisha wanamichezo 636 kati yao, 466 ni kutoka TPA, 95 kutoka ZPC ,52 kutoka DP WORLD Dar es Salaam na 23 kutoka Kampuni ya Meli Tanzania (TASHICO), ikiwa na kauli mbiu: “Michezo ya Bandari 2025 kwa afya, tija na mshikamano kwa wafanyakazi; tujitokeze kupiga kura Oktoba 29” .