Beatrice ang’ara, Top 5 Miss Grand 2025

MWAKILISHI wa Tanzania katika mashindano ya Miss Grand International 2025 yaliyomalizika nchini Thailand, Beatrice Alex Akyoo, amefanikiwa kupeperusha vyema bendera ya taifa baada ya kushika nafasi ya tano duniani, nafasi ya tatu katika kipengele cha Grand Talk, na nafasi ya 15 katika kipengele cha Talent, ambapo alitumbuiza kwa kucheza wimbo maarufu “Chambua kama Karanga” wa msanii Saida Karoli.

Mashindano hayo makubwa ya kimataifa yalifikia kilele chake Oktoba 18, 2025 (Jumamosi), ambapo Beatrice alifanikiwa kuingia katika Top 5 ya warembo bora wa mwaka huu, hatua iliyopokelewa kwa furaha kubwa na Watanzania wengi ndani na nje ya nchi. “Nashukuru Mungu kwa hatua hii niliyofikia. Ni fursa ya pekee kwa Tanzania kuonekana kimataifa. Nawashukuru Watanzania kwa sapoti yao,” alisema Beatrice.

Safari ya Ndoto Kutoka Dar es Salaam

Beatrice alizaliwa na kukulia jijini Dar es Salaam, katika familia inayothamini elimu, maadili na bidii. Tofauti na vijana wengi wanaoingia mapema katika ulimwengu wa urembo, yeye alianza safari yake kupitia elimu, akiwa amehitimu Shahada ya Sanaa na Ubunifu (Fine Arts & Design) kutoka Chuo Kikuu cha Dar es Salaam.

Ndoto ya Beatrice haikuwa tu kuvaa taji la urembo, bali kutumia jukwaa hilo kuelimisha jamii kuhusu thamani ya kujiamini, kujituma na kuthamini utu wa mwanamke. “Nilijua urembo ni zaidi ya sura. Ni jinsi unavyobeba ujumbe wako na kuhamasisha wengine kuota ndoto kubwa zaidi,” alisema.

Ushindi wa Kitaifa

Beatrice alitawazwa kuwa Miss Grand Tanzania 2025 katika hafla ya kuvutia iliyofanyika usiku wa kuamkia Agosti 17, 2025, katika ukumbi wa Superdome, Masaki jijini Dar es Salaam.

Mrembo huyo mwenye umri wa miaka 25 aliuwakilisha Mkoa wa Dar es Salaam katika shindano lililohusisha warembo 23 kutoka mikoa mbalimbali nchini. Ushindi huo ulimfungulia milango ya kuwakilisha Tanzania kwenye jukwaa la dunia la Miss Grand International 2025, ambako ameendelea kuonyesha uwezo wa hali ya juu katika kila kipengele cha mashindano hayo.

Kuelekea Jukwaa la Dunia

Katika mashindano hayo, Beatrice alionyesha mchanganyiko wa urembo, ujasiri na maarifa. Uwezo wake wa kujieleza kwa ufasaha na kuwasilisha hoja za kijamii, hasa kuhusu nafasi ya mwanamke katika maendeleo, uliwavutia majaji na mashabiki duniani kote.

Kupitia kipengele cha Grand Talk, Beatrice alishika nafasi ya tatu duniani, huku kipaji chake cha kucheza kikimuweka katika nafasi ya 15 bora kwenye kipengele cha Talent. Hata zaidi, kuingia kwake Top 5 ya dunia ni mafanikio makubwa kwa Tanzania na hatua inayoweka historia mpya katika tasnia ya urembo wa kimataifa.

Urembo Wenye Maana

Mbali na urembo, Beatrice anatambulika kwa kipaji chake cha kuchora, kupiga picha na kusafiri. Pia amekuwa mstari wa mbele katika kuhamasisha elimu jumuishi kwa watoto wenye ulemavu, hasa wale wanaotoka katika familia zenye mazingira magumu.

Ameeleza dhamira yake ya kuona kila mtoto anapata fursa sawa ya elimu katika mazingira yanayozingatia mahitaji maalum, akisisitiza kuwa mafanikio yake kwenye jukwaa la kimataifa yatatumika kuinua sauti ya watoto wenye changamoto hizo. “Nataka ushindi wangu uwe mwanga kwa watoto na wasichana wote wa Tanzania. Ni ushahidi kwamba urembo unaweza kuwa jukwaa la mabadiliko,” alisema kwa matumaini.

Maana ya Ushindi kwa Taifa

Ushindi wa Beatrice ni zaidi ya medali au taji. Ni alama ya matumaini mapya kwa vijana wa Kitanzania, hasa wanawake, kwamba ndoto kubwa zinaweza kufikiwa kupitia bidii, nidhamu na imani binafsi.

Kwanza, ushindi huu unaipa heshima Tanzania kimataifa, ukionyesha kuwa taifa lina vipaji vingi vinavyoweza kushindana na mataifa makubwa na kutoa motisha kwa sekta ya urembo na ubunifu nchini, sekta ambayo kwa muda mrefu imekuwa ikikabiliwa na changamoto za rasilimali na mitazamo hasi.

Ushindi huu pia unafungua milango ya kiuchumi, kwani unaleta taswira chanya ya nchi na kuvutia wawekezaji katika utalii, mitindo na maonyesho ya kimataifa.

Changamoto na Matarajio

Licha ya mafanikio haya, bado kuna kazi kubwa mbele. Sekta ya urembo nchini inahitaji uwekezaji zaidi katika mafunzo, maandalizi ya mashindano ya kitaifa, na uhamasishaji wa jamii kuhusu nafasi chanya ya mashindano haya. Aidha, serikali na wadau binafsi wanapaswa kuona mafanikio ya Beatrice kama fursa ya kuikuza tasnia ya ubunifu kama sehemu ya uchumi wa kisasa unaozingatia vipaji na ubunifu wa vijana.

Safari ya Beatrice Alex Akyoo kutoka mitaa ya Dar es Salaam hadi majukwaa ya kimataifa ni hadithi ya matumaini na uthubutu. Ni kielelezo cha jinsi ndoto zinavyoweza kuwa halisi pale zinapounganishwa na juhudi, maadili na malengo makubwa.

Kwa ushindi wake wa kuingia Top 5 duniani, Beatrice ameandika ukurasa mpya wa historia ya Tanzania na unaoonesha kuwa urembo wetu si wa uso pekee, bali ni wa moyo, akili na utu. Tanzania sasa ina kila sababu ya kujivunia binti huyu, ambaye kwa ujasiri wake, amethibitisha kwamba mrembo wa Kitanzania anaweza kuangaza ulimwengu. SOMA: Beatrice Alex ang’ara Miss Grand International