Benki yazindua mpango wa kitaifa kukabiliana na upungufu wa damu

Dar es Salaam: Benki ya Exim Tanzania imezindua mpango wa kitaifa wa kuchangia damu unaolenga kupunguza upungufu wa damu katika hospitali na vituo vya afya.

Juhudi hizi muhimu, kwa kushirikiana na Mpango wa Taifa wa Damu Salama (NBTS), zinafanyika katika mikoa sita mikubwa: Dar es Salaam, Dodoma, Mwanza, Arusha, Mtwara, na Mbeya. Katika mkoa wa Dar es Salaam, vituo vya uchangiaji damu vimepangwa kwa urahisi katika maeneo ya Mnazi Mmoja, Mbezi Mwisho, na Mbagala ili kuhakikisha upatikanaji kiurahisi kwa wachangiaji wote.

Katika kuadhimisha Siku ya Uchangiaji Damu Duniani tarehe 14 Juni, 2024, yenye kaulimbiu “Miaka 20 ya kusherehekea utoaji: asante wachangia damu!”, Benki ya Exim inaongeza juhudi zake za kuhamasisha umuhimu wa kuchangia damu. Mpango huu wa kitaifa wa kuchangia damu ni sehemu ya juhudi za kimataifa za kuharakisha maendeleo na kuhakikisha upatikanaji salama wa damu kwa wote.

Akizungumza katika hafla ya uzinduzi iliyofanyika Dar es Salaam, Stanley Kafu, Mkuu wa Masoko na Mawasiliano wa Benki ya Exim, alisema, “Dhamira yetu ya kudumu ya afya na ustawi wa jamii inatuchochea kuunga mkono mipango muhimu kama hii. Tumepiga hatua kubwa katika kusaidia wale wenye mahitaji, na tunatazamia kuendelea na kazi hii muhimu ili kuleta mabadiliko chanya kwa maisha ya Watanzania.”

SOMA: TAP TAP UTOBOE: Kuwajaza wateja fedha, bajaji na gari 

Aliongeza, “Tunawahimiza watu wote kushiriki katika mpango huu wa kuchangia damu unaookoa maisha. Kuchangia damu ni tendo la wema linaloweza kuleta mabadiliko makubwa katika maisha ya mtu. Pamoja, tunaweza kuhakikisha kuwa vituo vyetu vya afya vimejiandaa vizuri kushughulikia dharura na kutoa huduma muhimu.”

Dhamira ya Benki ya Exim katika uwajibikaji wa kijamii na ushirikishwaji wa jamii inaonekana kupitia mipango yake mbalimbali inayolenga kukuza ustawi wa kijamii, afya, kiuchumi, na uwezeshaji wa kijinsia nchini Tanzania. Mpango huu wa kuchangia damu ni sehemu ya juhudi pana za kuboresha huduma za afya na kusaidia wale wenye mahihitaji kote nchini. Benki ina historia ya kuunga mkono mipango inayohusiana na afya, ikiwa ni pamoja na mipango ya awali ya kuchangia damu na kampeni mbalimbali za afya.

Mwakilishi wa NBTS, Fatuma Mjungu, alieleza shukrani zake kwa mchango wa Benki ya Exim, akisema, “Tunashukuru sana kwa msaada usioyumba wa Benki ya Exim kwa mpango huu wa kuokoa maisha. Dhamira yao kwa afya na ustawi wa jamii inaonekana wazi kupitia ushiriki wao hai katika mpango huu wa kuchangia damu. Kwa msaada wao, tunaweza kuhakikisha vituo vyetu vya afya vimejiandaa vizuri kushughulikia dharura na kutoa huduma muhimu. Tunatoa wito kwa wadau wengi zaidi kujitokeza na kuwa mfano wa kuigwa kama Exim Bank.”

Hali ya uchangiaji damu nchini Tanzania inaonesha upungufu mkubwa katika kukidhi mahitaji ya kitaifa ya damu. Kwa mujibu wa takwimu za Wizara ya Afya za mwaka 2020, nchi inahitaji takriban mifuko 540,000 ya damu kila mwaka ili kuhudumia idadi ya watu milioni 54. Hata hivyo, mwaka 2016, mifuko ya damu iliyokusanywa ilikuwa chini ya 200,000, na kusababisha upungufu wa zaidi ya mifuko 300,000. Zaidi ya hayo, karibu 15% ya damu iliyokusanywa ilionekana kutofaa kwa matumizi kwa sababu mbalimbali, na hivyo kuongeza upungufu huo.

Mpango wa mwaka huu wa kuchangia damu unaendeleza juhudi za pamoja zilizoonekana katika mipango ya awali, ikiwa ni pamoja na matukio ya uchangiaji damu yaliyofanyika mwezi uliopita wakati wa maadhimisho ya Siku ya Msalaba Mwekundu Duniani jijini Dodoma. Haya yote yalifanyika kwa ushirikiano na NBTS na Chama cha Msalaba Mwekundu Tanzania (TRCS).

Msaada wa benki kwa mipango ya maendeleo ya serikali unajumuisha afya, elimu, ujumuishaji wa kifedha, na uwezeshaji wa wanawake. Dhamira ya muda mrefu ya Exim imeendesha maboresho makubwa katika maeneo haya muhimu, ikionesha kujitolea kwao kwa dhati katika kukuza maendeleo ya jamii kwa ujumla.

Kadri Benki ya Exim inavyoendelea kushinikiza mambo haya muhimu, wanachukua jukumu muhimu katika kuunda Tanzania yenye afya bora, ujumuishaji, na uwezeshaji mkubwa wa kijinsia. Mpango huu wa kuchangia damu ni mojawapo ya njia nyingi ambazo Benki ya Exim inachangia katika maendeleo ya taifa, ikithibitisha nafasi yao kama nguzo ya msaada na maendeleo ya jamii.

Habari Zifananazo

Back to top button