MOI yagawa viungo bandia bure

ZAIDI ya watu 800 walijitokeza katika zoezi la ugawaji wa miguu na mikono bandia kwa watu wenye uhitaji, lililofanyika chini ya Taasisi ya Tiba ya Mifupa na Ubongo Muhimbili (MOI) kwa kushirikiana na India.

Akifungua zoezi hilo, Mkurugenzi Mtendaji wa MOI, Balozi Dk. Mpoki Ulisubisya, amesoma hotuba ya Waziri wa Afya, Mohamed Mchengerwa, akiagiza wananchi waliopoteza viungo kujiunga ili kupata huduma hiyo bure inayotolewa na kampuni ya Emcure Pharmaceuticals ya India.

Waziri Mchengerwa amesema upatikanaji wa viungo hivyo bure unawawezesha wahitaji wenye kipato cha chini kurejea katika maisha ya kawaida na kufanya kazi kama awali. SOMA: MOI, India watengeneza miguu bandia kwa Watanzania 600

Balozi wa India nchini, Biswadip Dey, amesema  msaada huo ni muendelezo wa ushirikiano mzuri baina ya Tanzania na India. Aliongeza kuwa hii ni kambi ya pili kufanyika, ikilenga kurejesha utu, furaha na upendo kwa waliopoteza viungo.

Balozi Dk. Mpoki amesisitiza kuwa uchunguzi wa awali utatolewa bure, huku bima ya afya ikitumika tu kwa wahitaji waliyo na bima. Mkurugenzi wa Emcure Pharmaceuticals, Satish Mehta, amesema mpango huu utapanua huduma hiyo hadi vijijini kwa kuanzisha karakana ndogo za utengenezaji wa viungo bandia, ili kupunguza gharama za usafiri kwa wahitaji.

Miongoni mwa wanufaika, Amir Bakari, ameishukuru serikali, MOI na ubalozi wa India kwa kuwezesha upatikanaji wa msaada huu muhimu, akisisitiza kuwa unaleta faraja kubwa kwa maisha yao.