Serikali yaja na mkakati upatikanaji damu salama

WAZIRI wa Afya, Ummy Mwalimu amesema Serikali inadhamiria kuanzisha kanzi data ya kutambua makundi ya damu kwa watanzania wote ili kusaidia kukabiliana na changamoto ya upatikanaji wa damu salama kwa watu wenye makundi adimu ya damu.

Kwa mujibu wa ripoti iliyotolewa na Mpango wa Taifa wa Damu Salama kwa Waziri wa Afya Ummy Mwalimu kwamba inayo kanzi data ya watu takribani 350 ambao wapo kwenye Kundi O-Negative baada ya Kuwatambua kama kundi adimu la damu.

Waziri Ummy ametoa kauli hiyo leo Aprili 11, 2023 Jijini Dar es Salaam alipofanya ziara katika ofisi za mpango wa taifa wa damu salama ili kukagua na kuangalia hali ya upatikanaji wa damu nchini.

Waziri Ummy pia amepongeza hatua ya Watu takribani 20,032 ambao walijitokeza Kuchangia damu katika kipindi cha Wiki ya Matendo ya Huruma kwa Waumini wa Kanisa la Waadventista wa Sabato, Kampeni ya Kitaifa ya Robo Mwaka ya Tatu na Sikukuu ya Pasaka.

Vile vile ameipongeza Timu ya Yanga kwa kufanikisha ukusanyaji wa damu takribani chupa 544 kwa siku moja.