Uzembe Bandari Mombasa Wapunguza Mapato Kenya

BENKI ya Dunia imeonya kuwa Bandari ya Mombasa, kitovu cha uchumi wa Kenya na lango kuu la biashara Afrika Mashariki inakabiliwa na uzembe mkubwa wa kiutendaji unaochangia hasara za mamilioni ya dola kila mwaka.

Kwa mujibu wa ripoti ya Container Port Performance Index (CPPI) 2020–2024, iliyotolewa kwa ushirikiano na S&P Global Market Intelligence, Mombasa imeshika nafasi ya 375 kati ya bandari 403 duniani. Nafasi hiyo ya chini inaashiria ucheleweshaji wa meli, msongamano wa makontena na gharama kubwa za usafirishaji.

Ripoti inaeleza kuwa ucheleweshaji wa meli hugharimu kati ya dola za Marekani 20,000 hadi 50,000 kwa siku kwa kila meli. Gharama hizi huongezwa kwa waagizaji na hatimaye kwa walaji kupitia bei za bidhaa. SOMA: Jinsi Rushwa Inavyodhoofisha Uchumi wa Kenya

Takwimu zinaonesha gharama za usafirishaji kupitia Mombasa ni kati ya asilimia 35 hadi 42 ya thamani ya mzigo, ikilinganishwa na asilimia 8 hadi 10 barani Ulaya. Sababu zikitajwa ni mifumo ya forodha kusuasua, uhaba wa nafasi ya kuhifadhi makontena, urasimu na tuhuma za rushwa.

Mashirika ya sekta ya usafirishaji yakiwemo Kenya Ship Agents Association na Shippers Council of Eastern Africa yameripoti hasara kubwa za kila siku kutokana na msongamano bandarini.Kutokana na hali hiyo, baadhi ya kampuni za meli zimeanza kuelekeza mizigo yao kwenye bandari mbadala kama Port of Dar es Salaam hatua inayopunguza ushindani wa Kenya kikanda.

Wachambuzi wa uchumi wanaonya kuwa uzembe unaoendelea katika Bandari ya Mombasa si tatizo la kiutawala pekee bali ni changamoto ya kitaifa inayodhoofisha mapato ya serikali, uwekezaji na ukuaji wa uchumi wa Kenya.