Jengeni watoto wenye kuthamini amani

DIWANI wa Viti Maalumu Tarafa ya Suye mkoani Arusha, Michelle Mrema amewataka wanawake nchini kuendelea kuwa walezi wa amani, uvumilivu na mshikamano, akisisitiza kuwa misingi hiyo ni muhimu katika kuwalea watoto watakaokuja kuwa walinzi wa amani ya taifa.

Mrema ametoa rai hiyo wakati wa hafla fupi ya kuwashukuru Wanawake wa Umoja wa Wanawake Tanzania (UWT) mkoani Arusha kwa kumuamini na kumchagua kuwatumikia. Hafla hiyo ilifanyika katika Kata ya Sokoni I, Jijini Arusha, ikiwa na kauli mbiu isemayo “Wanawake wa UWT ni msingi wa amani, uongozi na maendeleo ya taifa.”

Amesema ili taifa liendelee kubaki salama, wazazi na walezi wana wajibu wa kuwalea watoto katika misingi ya maadili, uzalendo na mshikamano, itakayowawezesha kuwa mstari wa mbele katika kulinda amani ya nchi. SOMA: MWONGOZO WA MALEZI: Msingi wa urithi wa familia bora

Katika hatua nyingine, amewasihi wazazi kuhakikisha watoto wote wanapata haki ya msingi ya elimu kwa kuwapeleka shule ifikapo Januari 2026, na kuahidi kuwa karibu na watoto yatima na wenye mazingira magumu, akisisitiza kuwa ni jukumu la jamii kushirikiana katika kuwalea na kuwawezesha kufikia ndoto zao.