Wafanyabiashara wa maduka Kisarawe walia na Machinga

WAFANYABIASHARA wa maduka Wilaya Kisarawe wameomba kuondolewa kwa Machinga wanaopanga biashara mbele ya maduka yao na kusababisha wao kukosa wateja.

Wanasema hawawachukii Machinga kufanyabiashara lakini wamekerwa na hatua ya kupanga biashara mbele ya maduka yao na kusababisha kero kubwa huku wakiitaka Mamlaka ya Mapato (TRA) kwenda kutoa elimu ya ulipaji kodi wa hiyari na matumizi ya mashine za EFD.

Akizungumza katika mkutano wa viongozi wa Jumuiya ya Wafanyabishara (JWT) mfanyabishara John Masine, amewataka TRA kuwasaidia wafanyabishara urahisi wa kupata kodi na kuwalinda kwa kuondoa wamachinga mbele ya fremu za biashara zao.

“Mfanyabishara amekodi nyumba analipa kodi TRA, lakini anakuja mmachinga anaweka kibanda mbele yake na anauza bidhaa zinazofanana kwa bei ya chini zaidi na wala halipi kodi yoyote TRA zaidi ya ushuru wa serikali ya mtaa na hakuna anayejali zaidi ya kutaka kukamua kodi bila kujua tunauza au laa,” amesema Masine.

Naye Mfanyabishara Ester Moshi, ametaka wafanyabishara kutofunga biashara siku ya Jumamosi ya mwisho wa mwezi ambayo ni siku ya usafi kwasababu wanakwamisha shughuli za kiuchumi.

“Siyo kwamba siku hiyo biashara hazifanyiki hapana, zinafanyika lakini kwa kujificha na kukimbizana wakati serikali inaweza kupunguza muda ikawa muda wa kufungua ni saa mbili badala ya saa nne asubuhi,” amesema Moshi.

Naye Ofisa wa TRA wilayani humo, Mohamed Chifu, ameushukuru uongozi wa JWT chini ya Mwenyekiti wake Mwenyekiti wake Hamis Livembe kwa kazi kubwa wanayofanya ya kusikiliza kero za wafanyabishara lakini pia kutoa majibu ya kina kuhusu mambo mbalimbali yanayowahusu.

Amesema changamoto kubwa wanayokutana nayo TRA wilayani humo ni wafanyabishara wengi kuwa wa hali ya kati ambapo wanalipa kodi ndogo.

“Wengi wao wanalipa kodi ya ndogo kwa sababu ya halihalisi ya biashara, haujawa mji wa biashara kubwa. Kero ambazo zinatuhusu nimezibeba na naahidi nitaziwasilisha na kuzifanyia kazi,” amesema.