Madiwani waonywa vurugu kwenye halmashauri
KIGOMA: MADIWANI katika halmashauri za wilaya, miji na majiji wametakiwa kutokuwa chanzo cha vurugu zinazoweza kuchangia kuzorotesha uhusiano baina ya watendaji na madiwani na kukwamisha shughuli za maendeleo nchini na ukusanyaji mapato.
Naibu Katibu Mkuu Ofisi ya Waziri Mkuu TAMISEMI, Sospeter Mtwale amesema hayo akifunga mafunzo kwa madiwani wa Halmshauri ya wilaya Kigoma na manispaa ya Kigoma Ujiji ikiwa ni hitimisho la mafunzo kwa wajumbe wa mabaraza ya madiwani katika halmashauri 184 nchini.
Mtwale alisema kuwa madiwani wanapaswa kuwa kichocheo katika kubuni, kusimamia utekelezaji wa shughuli za maendeleo za halmashauri, kuchochea ukusanyaji mapato na kusimamia rasilimali watu, fedha na rasilimali zilizopo kwenye hamashauri ikiwemo rasilimali ardhi ambayo ndiyo msingi wa rasilimali kuu ya halmashauri.
Kufuatia mafunzo hayo, kiongozi huyo amesema kuwa mafunzo hayo yatawajenga madiwani kujua wajibu na mipaka ya utekelezaji wa majukumu yao ikiwemo kujua mipaka na viwango vya stahiki zao na kwa kuzingatia sheria na kanuni zilizopo madiwani watakuwa chachu kubwa ya kuleta maendeleo kwenye halmashauri zao.
Akieleza madhumuni ya mafunzo hayo yaliyotolewa na chuo ch serikali za mitaa Hombolo, Mkuu wa chuo hicho, Dk.Yusuph Mashala amesema mafunzo yalilenga kuwajengea uwezo madiwani kujua wajibu, majukumu, mipaka ya utendaji wao na nafasi yao katika kuchochea maendeleo kwenye halmashauri zao na jukumu la kusimamia maendeleo, ukusanyaji wa mapato na matumizi ya halmashauri.
Akizungumza kwa niaba ya madiwani wa halmashauri hizo mbili za mkoa Kigoma zilizokamilisha mafunzo hayo Meya wa Manispaa ya Kigoma Ujiji, Mussa Maulid alisema kuwa mafunzo hayo yatakuwa nyenzo kubwa kwa madiwani kwani yatawawezesha kutambua majukumu yao na mipaka yao na kuondoa sintofahamu zilizokuwa zikijitokeza kwa kutojua mambo mengi ambayo hayakupaswa kufanyika kisheria na kanuni za halmashaurii.
