Madereva wanawake wahimizwa mbio za magari
MOROGORO: MKUU wa Wilaya ya Morogoro, Mussa Kilakala ametoa hamasa kwa wanawake nchini ambao ni madereva kujitokeza kwa wingi kushiriki mchezo wa mashindano ya mbio za magari kama ilivyo kwenye michezo mingine ili kuleta ushindani .
Kilakala ametoa wito huo wakati akizundua mashindano ya mbio za magari ya Serengeti Rally Tanzania 2026 yaliyoanza Oktoba Mosi na kufikia tamati Oktoba 4, 2026 kwenye shamba la miti la Wakala wa Huduma za Misitu Tanzania (TFS), mkoani Morogoro.
Mashindano hayo yanayoshirikisha madereva 24 kutoka ndani na nje ya Tanzania na miongoni mwao tisa wanashiriki kuwania ubingwa wa African Rally Championship , na wengine wakiwania ubingwa wa ndani.
“ Nichukue fursa hii niwahamasishe wanawake amba oni madereva kujitokeza kwa wingi kushiriki mchezo huo “ amesema Kilakala.
Katika mashindano hayo mwanamke Susan Muwonge, ndiye pekee aliyejitosa kushiriki kwenye mashindano hayo akiwakilisha nchi yake ya Uganda akiwania ubingwa wa African Rally Championship.
Mkuu wa wilaya pia amewataka watazamaji kuzingatia usalama wakati wote wa mashindano na umuhimu wa kutunza mazingira ili shughuli zao zisiathiri uoto wa asili wa Msitu wa Shamba la Miti Morogoro.
Kilakala pia amesisitiza umuhimu wa kutunza mazingira na kuhakikisha shughuli zao haziathiri uoto wa asili na mazingira.
Naye, Msimamizi Mkuu wa mashindano hayo, Dk Mosi Makau amesema mashindano hayo yanaleta fursa na kuongeza uchumi kwa wananchi wa mkoa wa Morogoro.
Kwa upande wake Naibu Kamishna wa Uhifadhi na Mkurugenzi wa Uzalishaji Mbegu za Miti TFS, Dk Hamza Katety amesema Wakala huo utaendelea kusimamia na kulinda mazingira ambayo ni sehemu muhimu ya kuwezesha shughuli mbalimbali kufanyika katika maeneo ya misitu.
Dk Katety amehimiza wananchi kutumia fursa hiyo pia kujifunza na kufanya utalii wa ikolojia, kwa kutembelea hifadhi na maeneo mbalimbali ya asili yanayopatikana mkoani Morogoro ambayo yanasimamiwa na Wakala huo.
