UFARANSA : RAIS wa Ufaransa, Emmanuel Macron, ametangaza uteuzi wa François Bayrou kuwa Waziri Mkuu mpya wa nchi hiyo, akilenga kuondoa mgogoro wa kisiasa unaoikumba Ufaransa.
Bayrou anatarajiwa kuwa miongoni mwa wajumbe wa baraza la mawaziri lililojumuisha mawaziri wa zamani na watumishi waandamizi wa serikali, watakaosaidia kusimamia kupitishwa kwa bajeti ya mwaka 2025.
Aidha, Rais Macron alimteua Waziri Mkuu wa zamani, Elisabeth Borne, mwenye umri wa miaka 63, kuwa Waziri wa Elimu katika baraza jipya la mawaziri. Borne atakuwa na jukumu muhimu katika kuboresha sekta ya elimu nchini Ufaransa.
Waziri Mkuu mwingine wa zamani, Manuel Valls, mwenye umri wa miaka 62, ameteuliwa kuwa Waziri wa Maeneo ya Nje yaliyo chini ya usimamizi wa Ufaransa.
Valls atakuwa na jukumu la kusimamia maeneo ya nje ya nchi kama vile maeneo ya visiwa na maeneo mengine yanayohusiana na utawala wa Ufaransa.
Aliyekuwa Waziri wa Mambo ya Ndani, Gérald Darmanin, pia ameteuliwa kuongoza Wizara ya Sheria, ambapo atakuwa na jukumu la kuangalia masuala ya sheria na haki za kiraia nchini.
Waziri wa Ulinzi, Sébastien Lecornu, na Waziri wa Mambo ya Nje, Jean-Noël Barrot, wamebaki katika nafasi zao. Lecornu, mwenye umri wa miaka 38, ni mshirika wa karibu wa Rais Macron na amehudumu katika kila serikali tangu Macron alipochaguliwa kuwa Rais mwaka 2017. SOMA: Waziri mkuu wa Ufaransa kujiuzulu
Uteuzi huu ni sehemu ya juhudi za Rais Macron kuimarisha utawala wake na kuhakikisha utulivu wa kisiasa nchini Ufaransa huku akielekea katika hatua muhimu za kisiasa, ikiwemo kupitisha bajeti ya mwaka 2025.
