Madaktari 30 kutoa huduma bure Ubungo

MADAKTARI 30 kutoka China wanatarajiwa kuendesha kambi maalum ya siku mbili ya kutoa huduma za afya bure kwa wananchi wa Wilaya ya Ubungo, jijini Dar es Salaam, mnamo Machi 28 na 29, 2026. Kambi hiyo itafanyika katika Kituo cha Biashara cha EACLC na inalenga kuwasaidia wananchi kupata uchunguzi na matibabu ya magonjwa mbalimbali bila malipo.

Akizungumza na waandishi wa habari, Mkuu wa Wilaya ya Ubungo Albert Msando, amesema madaktari watatoa huduma za upimaji na matibabu ya magonjwa ikiwemo kisukari, magonjwa ya moyo, saratani, shinikizo la damu, pamoja na matatizo ya viungo kama pua na masikio.

“Tunawaalika wananchi wote kujitokeza kwa wingi. Wazazi na walezi wahakikishe wanawaleta watoto wao ili wapate upimaji na matibabu bure,” alisema Msando. SOMA: JKCI waendesha uchunguzi, matibabu bure sherehe za Uhuru

Afisa Uhusiano na Habari, Linda Mtui amesema kambi hiyo haitatoa tu matibabu, bali pia ushauri wa kitaalamu kuhusu afya, pamoja na huduma maalum kwa wanawake na watoto. Ameongeza kuwa Kituo cha Biashara cha EACLC hakilengi biashara pekee, bali pia kinajali afya na ustawi wa jamii inayokihudumia.Kambi hiyo inatarajiwa kuwa msaada mkubwa kwa wakazi wa Ubungo na maeneo jirani katika kuboresha afya zao.