Makamu wa Rais ataka kuombea viongozi, Bara, Visiwani

MAKAMU wa Pili wa Rais wa Zanzibar, Hemedi Abdulla amewaomba watanzania kuwaombea viongozi wa serikali zote mbili ili kudumisha umoja, amani na mshikamano wa kuimarisha Jamhuri ya Muungano wa Tanzania.

Abdulla pia amewataka viongozi, wazee na wengine wenye elimu ya muungano kuwaelimisha vijana kuhusu muungano wa Tanganyika na Zanzibar ili waendele kuenzi.

Abdulla ametoa rai hiyo leo tarehe 25 Aprili, 2025 katika maadhimisho ya miaka 61 ya Jamhuri ya Muungano wa Tanzania ambayo yamefanyika leo Mkoani Mtwara.

“Niwaombe watanzania wenzangu tuendelee kuwaunga mkono viongozi wa taifa letu, kuwaombea kwa Mwenyezi Mungu waendelee kudumisha amani na umoja wetu,” amesema.

Katika hatua nyingine, Abdulla amesema tangu kuanzishwa kwa Jamhuri wa Muungano wa Tanzania, taifa limepata maendeleo makubwa pande zote mbili.

Amesema mafanikio yamepatikana kutoka na umahiri, uimara na umoja ikiwemo amani ambayo imeimarishwa na viongozi wa Jamhuri ya Muungano wa Tanzania.

Ametaja mkoa wa Mtwara ambapo serikali imefanya maendeleo makubwa kwenye sekta mbalimbali ikiwemo elimu, afya, na kilimo.

“Serikali ya Muungano imeleta maendeleo makubwa, mfano kwenye elimu hii serikali ya awamu wa sita tu imetoa shilling bilioni 83.65 za elimu katika mkoa wa Mtwara, pesa hizo zimejanga, madarasa na miundombinu mbinu mingine ya elimu,” amesema.