Oprah: Safari kutoka umasikini hadi utajiri
OPRAH Winfrey ni jina linalotambulika duniani kote kama alama ya mafanikio, uthubutu na uvumilivu. Alizaliwa tarehe 29 Januari 1954 katika kijiji cha Kosciusko, jimbo la Mississippi, Marekani. Kutoka katika familia duni, alikulia kwenye mazingira yenye changamoto nyingi za kiuchumi na kijamii. Hata hivyo, leo hii anahesabika miongoni mwa wanawake wenye ushawishi mkubwa na utajiri duniani akiwa mmiliki wa kampuni kadhaa za vyombo vya habari na taasisi za kijamii.
Maisha ya Utotoni na Changamoto
Oprah alilelewa katika familia iliyokuwa ikitegemea misaada ya kijamii kutoka serikalini. Wazazi wake, Vernita Lee na Vernon Winfrey, walitengana akiwa bado mchanga, jambo lililomfanya aishi na bibi yake ambaye alimfundisha thamani ya elimu, maombi na maadili. Maisha yake hayakuwa mepesi; alikabiliana na unyanyasaji wa kijinsia akiwa bado mtoto. Lakini badala ya kukata tamaa, aliamua kuyageuza maumivu kuwa chachu ya mafanikio.
Katika mahojiano yake mbalimbali, amewahi kusema: “Nilijifunza mapema kuwa maisha yanaweza kunichosha, lakini sitaruhusu kunishinda.” Kauli hii imekuwa dira ya maisha yake na chanzo cha msukumo kwa mamilioni ya watu duniani.SOMA: NDOTO YANGU, MAISHA YANGU
Elimu na Safari ya Kuelekea Utangazaji
Baada ya kuhama kati ya wazazi wake mara kadhaa, Oprah alipata udhamini wa kusomea Mawasiliano ya Umma katika Chuo Kikuu cha Tennessee State. Akiwa mwanafunzi, alianza kazi ya utangazaji katika kituo cha redio cha eneo hilo. Kipaji chake cha kuzungumza kwa ujasiri na kugusa hisia za watu kilimtofautisha na watangazaji wengine. Mwaka 1984 alipata nafasi ya kuendesha kipindi cha asubuhi AM Chicago, ambacho ndani ya miezi michache kiligeuka kuwa maarufu zaidi katika jiji hilo.
Kuzaliwa kwa The Oprah Winfrey Show
Kutokana na mafanikio hayo, mwaka 1986 kipindi hicho kilibadilishwa jina na kuwa “The Oprah Winfrey Show” kipindi ambacho kilibadilisha sura ya vipindi vya mazungumzo duniani. Kupitia mtazamo wake wa kipekee wa kuzungumza kwa uwazi, huruma na uhalisia, Oprah aliwagusa watu kutoka tabaka zote. Mada zake zilihusu familia, ndoa, changamoto za kijamii, na mafanikio binafsi. Kwa zaidi ya miaka 25, kipindi chake kilivutia watazamaji zaidi ya milioni 20 kila wiki nchini Marekani na wengi wakikiita “shule ya maisha.”
Kuanzisha Himaya ya Vyombo vya Habari
Oprah hakubaki kuwa mtangazaji tu. Alianzisha kampuni yake ya uzalishaji, Harpo Productions, ambayo ilimwezesha kumiliki na kuzalisha vipindi vyake binafsi. Kupitia kampuni hiyo, alishiriki pia katika uzalishaji wa filamu kama The Color Purple, Beloved na Selma zilizotamba duniani. Aidha, alianzisha , The Oprah Magazine na Oprah’s Book Club ambayo imekuwa ikiwainua waandishi wengi. Pia ni mmiliki wa mtandao wa televisheni Oprah Winfrey Network ( OWN).
Utajiri, Heshima na Mchango wa Kijamii
Kwa mujibu wa Forbes, Oprah anakadiriwa kuwa na utajiri unaozidi dola bilioni 3.1 za Kimarekani, akiwa mwanamke Mweusi wa kwanza kuwa bilionea nchini Marekani. Kupitia Oprah Winfrey Charitable Foundation, ametoa mamilioni ya dola kusaidia elimu, afya na ustawi wa jamii. Mwaka 2007, alifungua shule ya wasichana nchini Afrika Kusini inayojulikana kama “Oprah Winfrey Leadership Academy for Girls” kwa lengo la kusaidia watoto wa kike wenye vipaji lakini wasiokuwa na uwezo.
Imani, Maadili na Mafunzo ya Maisha
Oprah anaamini mafanikio ya kweli yanatokana na kujitambua na kumtumikia Mungu. Anapenda kusema: “Ukiangalia unacho, utapata zaidi. Ukiangalia unachokosa, hutatosheka kamwe.” Safari yake ni ushuhuda wa uthubutu wa mwanamke aliyepigana kuvuka mipaka ya jinsia, umaskini na majeraha ya zamani. Kutoka msichana wa Mississippi hadi kuwa malkia wa vyombo vya habari duniani, Oprah Winfrey amethibitisha kwamba ndoto kubwa zinaweza kutimia kwa bidii, maadili na imani.
