Salipina (21) ashikiliwa mauaji ya Rashidi

JESHI la Polisi mkoa wa Morogoro linamshikilia mwanamke Salipina Thomas (21) mkazi wa kitongoji cha Temekero, kijiji cha Kiroka, Wilayani Morogoro kwa tuhuma za mauaji ya Rashid Said Mahalangande (20) ambapo wawili hao walikuwa na uhusiano wa kimapenzi.

Kamanda wa Polisi wa mkoa, Fortunatus Musilimu amesema Septemba 17, 2022  kuwa  mauaji  hayo yalitokea  majira ya saa nane usiku wa kuamkia  Septemba 16, mwaka huu  kitongoji  cha Temekero.

Musilimu amesema  mauaji hayo yanahusishwa na wivu wa kimapenzi ambapo kijana aitwaye  Richard Stephen Chanzila (23) mkazi wa Kitongoji cha Maembe, Kijiji cha Kiloka ndiye anatuhumiwa kutekeleza mauaji hayo.

Kamanda Musilimu amesema, mtuhumiwa huyo inadaiwa alimkata na kitu chenye ncha kali shingoni kijana Mahalagande  (20), mkazi wa Sultan Area, Manispaa ya Morogoro ambaye pia alikuwa akijishughulisha na bodaboda.

Musilimu amesema  kuwa, chanzo  ni wivu wa mapenzi ambapo  marehemu alikutwa amelala ndani ya nyumba Salipina  ambaye ni  mfanyabiashara  na mkazi wa kitongoji Temekero ambaye ni mzazi mwenzake na pia walikuwa na mahusiano.

Kwa mujibu wa Kamanda wa Polisi wa mkoa kuwa,  baada ya kuwakuta wamelala kwenye nyumba ya huyo mzazi mwezake ndipo alipomkata  Mahalagande sehemu ya shingoni kwa kutumia kitu chenye ncha kali.

Amesema  baada ya  Mahalagande kukatwa  na kitu chenye ncha kali, mwanamke huyo alifanikiwa kukimbia na  kwenda kuomba  msaada.

Musilimu amesema, Chanzila baada ya kufanya mauaji hayo  aliubeba mwili wa marehemu na kwenda kuutupa porini umbali wa mita 100 kutoka eneo alilofanyika mauaji.

Amesema mtuhumiwa huyo alikimbia kijijini hapo kwenda kusikojulikana  baada ya mauaji hayo na  Polisi inaendelea kumtafuta ili kumtia mbaroni  na kufikishwa katika  vyombo vya sheria ili  kuchukua mkondo wake.

“Nawasihi wananchi ya kwamba kufanya mauaji ya aina mbalimbali kutokana na mapenzi, ushirikina au migogoro mbalimbali sio maamuzi sahihi , ni kinyume cha sheria , zipo njia ambazo zinaweza kutumika kupata suluhu ya  mambo yanayojitokeza badala ya kuchukua maamuzi ya kuua mtu” amesema  Musilimu.

Musilimu ameishauri  jamii ya kwamba badala ya kuchukua maamuzi ya  kuua mtu  ,  ni vyema watumie njia mbalimbali kutusaidia kupata suluhu ya changamoto wanazokabiliana nazo  kimaisha .

Habari Zifananazo

Back to top button