Serikali kuwalinda walimu kesi za wanafunzi

SERIKALI imeeleza nia ya kuwalinda walimu wanao simamia maadili kwa wanafunzi shuleni na vyuoni huku wakitakiwa kuendelea kuwasaidia wanafunzi katika malezi na maadili  yenye misingi bora.

Imedaiwa walimu  kutishiwa pale wanapofundisha maadili,wanapokwenda kutoa ushahidi kesi za kulawitiwa au ubakaji mahakamani  na kupigiwa simu au kutumia jumbe za meseji waachane na masuala hayo.

Walimu waliyasema hayo jana kwenye mafunzo ya walimu wa malezi yaliyokuwa yakitolewana na Gerald Mwaitebele ambaye ni katibu msaidizi ofisi ya Rais Sekretariet ya Maadili Viongozi na Umma Kanda ya Magharibi inayojumuisha mikoa ya Tabora, Kigoma Simiyu na Shinyanga.

Mwaitebele alisema serikali ipo kazini hakuna mwalimu atakayewatisha kwani wameamua kuzunguka kila mkoa kuhamasisha uundwaji wa  vilabu vya maadili mashuleni na vyuoni ili wanafunzi wajitambue na kuendelezwa maadili  hayo pindi wawapo kazini na kwenye jamii inayowazunguka.

“Walimu tutawalinda wazazi wengine  hawana tabia nzuri hilo linafahamika ukimuadhibu mtoto anakuja kakushikia kiuno shuleni pia mnapoitisha mikutano ya  wazazi   muweke mashairi na maigizo  yenye ujumbe wa maadili ili wazazi waone wajifunze alisema Mwaitebele.

Kaimu  ofisa elimu Mkoa wa Shinyanga ambaye ni mratibu wa maadili,  Baraka Kasinyo akielezea suala la uzalendo alisema  klabu hizo shuleni na vyuoni zitawafanya wanafunzi kuipenda nchi yao,kuitetea, uwajibikaji na kutii sheria,kudumisha demokrasia na kutunza rasilimali   na wazazi watakao watishia walimu  Serikali ipo na vyombo vyake vya sheria.

Akimwakilisha katibu tawala mkoa wa Shinyanga katibu  tawala msaidizi  Ibrahimu Makana alisema  lengo la kuwepo   klabu za maadili shuleni na vyuo vitawajenga wanafunzi katika misingi bora ya kuwa waadilifu na waaminifu tangu wakiwa shuleni.

Mwalimu Anael Yeunge kutoka shule ya msingi Town  manispaa ya Shinyanga alisema masuala ya ulawiti kwa watoto yanatoka huko kwenye jamii  na wazazi hawafuatilii na mwalimu kuja kugundua  ni muda mrefu na anapokwenda kutoa ushahidi  mahakamani wanakutana na vitisho.

Mwalimu wa shule ya msingi Kambarage Amos Nkungu  alisema shule hiyo imezungukwa na vilabu vya pombe walevi wanapita na kutoa lugha chafu na watoto wamekuwa wakiiga hivyo  Serikali ichukue hatua ya kupiga marufuku vilabu karibu na maeneo ya shule