KAGERA; Katika kuhakikisha Mikoa iliyo pembezoni inaungwanishwa na Tanzania ya Kidigitali, Mfuko wa Mawasiliano kwa Wote unatarajia kujenga minara 45 katika kata 44 yenye thamani ya Sh Bilioni 6.6 mkoani Kagera.
Hayo yamebainishwa Julai 16, 2024 na Mtendaji Mkuu wa UCSAF, ustina Mashiba, wakati akitoa taarifa ya utendaji wa Mfuko Mkoa wa Kagera, mbele ya Waziri wa Habari, Mawasiliano na Teknolojia ya Habari, Nape Nnauye aliye katika siku ya pili ya ziara yake Mikoa ya Kanda ya Ziwa kukagua ujenzi wa minara ya mawasiliano ya simu.
Amesema minara hiyo 45 ya Kagera ni kati ya minara 758 inayofadhiliwa na serikali kwa kipindi cha miaka miwili kuanzia mwaka wa fedha 2023/2024 hadi 2024/2025 , ambapo kwa Mkoa wa Kagera ikitarajiwa kuwanufaisha Watanzania 801,961 itakapokamilika mwanzoni mwa mwaka 2025.
Amesema, Mkoa wa Kagera ni kati ya mikoa 26 Tanzania Bara, itakayonufaika na kwamba wilaya za mkoa huo inakojengwa minara 45 na idadi ya minara kuwa ni Biharamulo (13), Bukoba DC (1), Karagwe (14), Missenyi (3), Kyerwa (4), Muleba (8) na Ngara (2).
Soma: Nape: Kamilisheni minara 5 Kigoma
Amesema hadi kufikia mwishoni mwa Juni 2024, jumla ya minara kumi imeshawashwa na watoa huduma za mawasiliano.
Mtendaji Mkuu huyo wa UCSAF amesema, kupitia minara 10 iliyowashwa vijiji kadhaa vya wilaya hizo vimenufaika na mradi huo, katika kata 44 zikiwemo Kaniha, Nyakahura, Nyantakara, Nyarubungo, Igurwa, Kihanga, Kakunyu, Karambi na Ngenge.
View this post on Instagram
Kwa ujumla tangu mwaka 2009 jumla ya minara 80 imejengwa katika wilaya saba za Mkoa wa Kagera, kutokana na makubaliano kati ya serikali, kupitia Mfuko wa Mawasiliano kwa Wote (UCSAF) na watoa huduma za mawasiliano.
Mashiba amesema, minara hiyo iliyojengwa kwa teknolojia ya 2G, 3G na 4G, kwa ruzuku iliyotolewa na UCSAF, imegharimu jumla ya Shilingi Bilioni 10.89, na inawanufaisha Watanzania 1,248,911.
Ametaja wilaya 7 zinazofaidika na minara hiyo na idadi ya minara iliyojengwa, kwenye mabano, kuwa ni Biharamulo (15), Bukoba DC (5), Karagwe (22), Missenyi (14), Kyerwa (6), Muleba (4), na Ngara (14).
