Skylong yatajwa fursa ya kiuchumi, utalii Zanzibar

ZANZIBAR; Uzinduzi wa hoteli ya Skylong Resort Zanzibar umeelezwa utafungua milango kwa sekta ya utalii mjini humo..

Uzinduzi huo ulihudhuriwa hivi karibuni na viongozi mbalimbali, maofisa wa serikali na wanahabari.

Akizungumza katika hafla hiyo,Naibu Waziri wa Utalii Zanzibar, Mudrick Soraga, ameisema uzinduzi huo unatarajiwa kuchochea uchumi wa ndani kwa kutengeneza ajira na kuimarisha hadhi ya Zanzibar kama kivutio cha utalii duniani.

“Wajasiriamali wadogo na mafundi wa ndani pia wanatarajiwa kunufaika kutokana na ongezeko la watalii, jambo ambalo litaongeza uzoefu wa kitamaduni kwa wageni wetu,” alisema Waziri.

Kwa upande wake, Meneja Mkuu wa Mradi wa hoteli hiyo, Eric Leo, alionesha furaha yake kufuatia ufunguzi huo.

“Tumefurahi sana kuwakaribisha wageni wetu wa kwanza katika Skylong Resort. Dhamira yetu ni kutoa huduma ya kipekee isiyosahaulika huku tukiheshimu uzuri na utamaduni wa Zanzibar,” alisema

Mkurugenzi Mtendaji wa Showtime Zanzibar, Ibrahim Mitawi, ambaye aliongoza hafla hiyo, alisema hoteli hiyo imeweka mkazo mkubwa katika matumizi ya mifumo rafiki kwa mazingira.

Kufunguliwa kwa Skylong Resort Zanzibar kunatajwa kuwa chachu mpya ya utalii visiwani, huku ikitarajiwa kuwa nguzo muhimu katika mandhari ya utalii.