TET yawasilisha mabadiliko ya mitaala mipya ya elimu

ARUSHA: TAASISI ya Elimu Tanzania (TET) leo Oktoba 13, 2023 imewasilisha mapendekezo ya muundo wa elimu na mabadiliko yaliyopo kwenye rasimu ya mitaala mipya ya elimu kwa bodi na menejimenti ya Elimu na Mafunzo ya Ufundi Stadi (VETA).

Wasilisho hilo limefanyika katika chuo cha Utalii cha VETA jijini Arusha.

Lengo la wasilisho hilo ni kuwapatia ufahamu Bodi na Menejimenti ya VETA kuhusu utekelezaji wa elimu ya Amali kwa Sekondari hatua ya chini ambapo utekelezaji wake kwa kiasi kikubwa utafanywa na kusimamiwa na VETA.

Mkurugenzi Mkuu wa Taasisi ya Elimu Tanzania (TET) Dkt. Aneth Komba amefanya wasilisho hilo mbele ya mwenyekiti wa bodi hiyo Prof. Sifuni Mchome na wajumbe wa bodi pamoja na menejimenti ya VETA ambapo ameeleza kuwa mitaala mipya itasaidia katika kumuandaa mwanafunzi kujitegemea kwani atakuwa na uwezo mzuri kutokana na ujuzi atakaopata kupitia mabadiliko hayo ya elimu.

“Maboresho haya ya Mitaala mipya ya elimu yamefanyika kwa kutekeleza agizo la Rais Samia Suluhu Hassan ya kuboresha elimu itakayomuwezesha muhitimu kuweza kujiajiri na kuajiriwa baada ya kumaliza masomo yake, “amesema Dk Komba.

Kwa upande wake Mwenyekiti wa Bodi ya VETA, Prof Mchome ameeleza kuwa wasilisho la Mitaala ni jambo jema kwao kuweza kupata uelewa kwa wajumbe na menejimenti nzima ya VETA na kuwa itawazesha kujipanga katika utoaji elimu kwenye eneo lao la Elimu ya Amali.

“Matarajio kwa wananchi ni makubwa kwenye maboresho ya mitaala hii hivyo ni wazi kuwa sasa kazi itaanza vyema ya kuhakikisha elimu imeboreshwa na kwamba sasa tunapaswa kujipanga vyema kama VETA amesema Prof. Mchome.