Uzalendo utawale mawazo, matendo ya vijana

DAR ES SALAAM: UZALENDO ni nguzo muhimu katika ujenzi wa taifa lolote; ni nguvu ya ndani inayomfanya mtu kuthamini nchi yake, kuitumikia kwa moyo mmoja na kuipa kipaumbele katika maamuzi ya kila siku.

Leo, zaidi ya wakati mwingine wowote, tunahitaji uzalendo uongoze mawazo na matendo yetu kutokana na kasi ya mabadiliko ya dunia inavyokwenda.

Kila mmoja wetu ana nafasi ya kipekee katika kuijenga nchi na ili kujenga nchi, kila mmoja anapaswa kuwa mzalendo. Neno hilo haliishii kwenye kupigania mipaka kama ilivyokuwa zamani bali unajidhihirisha katika mambo madogo tunayofanya kila siku.

Tunapolinda mali za umma, kuheshimu sheria, kutenda haki, kufanya kazi kwa bidii na kuchangia katika ustawi wa jamii, tunakuwa tumedhihirisha uzalendo kwa vitendo. Pia, kuhimiza amani, kupinga rushwa na kulinda rasilimali za taifa ni sehemu muhimu ya kuonesha upendo kwa nchi yetu.

Ni lazima tukubali kuwa taifa haliendelezwi na viongozi pekee bali linajengwa na raia kwa kiasi kikubwa hususani wanaoweka maslahi ya nchi mbele ya maslahi binafsi, bila kujali utofauti uliopo wa kidini, kiitikadi, jinsia wala kiumri.

Tunapokuwa na mawazo ya kizalendo, tunafanya maamuzi yanayolenga manufaa ya vizazi vya sasa na vijavyo na tunatumia talanta, elimu na maarifa yetu kuleta suluhisho badala ya malalamiko, tunatumia sauti zetu kuhimiza maendeleo na si kugawa jamii.

Rais Samia Suluhu Hassan wakati akihutubia taifa, kupitia mazungumzo yake na Wazee wa Dar es Salaam mnamo Desemba 2, 2025 aliwataka wazee nchini kuendelea kuhamasisha amani kwa kuwapatia vijana elimu ya uzalendo na kuwahimiza kuipenda na kuilinda nchi yao.

Hii inatoa msisitizo kuwa vijana wana uwezo wa ama kulijenga au kulibomoa taifa kwa sababu wao ndio kizazi cha leo; kila kitu kipo mikononi mwao, hivyo uzalendo wa vijana utalijenga na kulilinda taifa kupitia mawazo na matendo yao.

Katika kizazi hiki kilichotawaliwa na maendeleo makubwa ya teknolojia na utandawazi, vijana wanapaswa kuongoza mapinduzi ya uzalendo wa kisasa; uzalendo unaoheshimu utofauti, unaokuza ubunifu na unaochochea maendeleo ya kiuchumi.

Taifa lenye watu wazalendo ni taifa lisiloweza kutikisika kwa urahisi; lenye mshikamano na lenye dira ya pamoja, hivyo uzalendo ukitawala mawazo na matendo, tunaweza kuijenga Tanzania yenye nguvu, umoja na mafanikio ya kudumu.

Wazo hili limeandaliwa na Ramla Hamidu, Mwandishi wa Gazeti la HabariLeo