ZAIDI ya wagonjwa 500 wanatarajiwa kunufaika na kambi ya huduma mkoba ya matibabu ya kibingwa ya mtoto wa jicho kwa siku saba wilayani Chunya mkoani wa Mbeya.
Wataalamu kutoka Hospitali ya Rufaa ya Kanda Mbeya leo wamewasili ambapo kambi hiyo inayoratibiwa na Shirika la Helen Keller International (HKI) kwa kushirikiana na Hospitali ya Rufaa ya Kanda Mbeya, Hospitali ya Rufaa ya Mkoa wa Mbeya.
Akizungumza na washiriki wa kambi hiyo daktari bingwa wa macho na kiongozi wa timu ya wataalamu hao Dk Barnabas Mshangila ameeleza kuwa kambi hiyo inatoa fursa kwa wagonjwa wengi ambao hawana uwezo wa kugharamia matibabu ya Mtoto wa jicho na kuwasaidia kuondokana na matatizo hayo.
“Timu imejipanga vizuri katika kutoa huduma za matibabu ya kibingwa. Tumejipanga kwa kila hali na tunatarajia kutoa huduma bora kwa wagonjwa wetu.
Ameongeza “Ni muhimu kuhakikisha kwamba kila mtu anayehitaji huduma za macho anapata matibabu stahiki.”- DkMshangila
Naye Dk. Fariji Kilewa Mratibu wa huduma za macho mkoa wa Mbeya pia ameongeza, “Huduma kama hizi ni muhimu sana katika jamii zetu, na tunawashukuru wadau wote wanaohusika katika kutekeleza mradi huu. Ushirikiano wa pamoja unasaidia kufanikisha malengo yetu ya kutoa matibabu bora kwa wagonjwa wa Mtoto wa jicho.”
Kwa upande wake, Ofisa Mradi kutoka Shirika lisilo la Kiserikali la Helen Keller,Allen Lemilia amesema kuwa shirika hilo litaendelea kuiunga mkono Serikali ya Jamhuri ya Muungano wa Tanzania chini ya Rais Dk. Samia Suluhu Hassan katika kuboresha huduma za matibabu ya macho kwa wananchi walio maeneo mbali na maeneo ya kutolea huduma za afya.
“Tunaiunga kwa kufanya huduma mkoba katika kupeleka wataalamu pamoja na vifaa tiba vya kutolea huduma ili kurahisisha upatikanaji wa huduma hiyo na kupunguza gharama kwa jamii kuungana pamoja kutimiza malengo ya kupunguza tatizo la upofu katika mkoa wa Mbeya.
Amesema wanatambua changamoto za watu ambao hawana uwezo wa kupata matibabu haya ya mtoto wa jicho.
“Kambi hii ni muhimu katika kuhakikisha kwamba jamii wanaweza kupata matibabu ya macho na kuondokana na matatizo yanayoweza kuathiri maono yao na maisha yao ya baadaye.
