WMA yakagua vifaa zaidi ya milioni moja 2024/25
WIZARA ya Viwanda na Biashara kupitia Wakala wa Vipimo (WMA), imekagua na kuhakiki jumla ya vifaa vya vipimo 1,013,859 katika mwaka wa fedha 2024/2025, sawa na asilimia 99.2 ya lengo la mwaka ambalo ni vifaa 1,022,342.
Hayo yalibainishwa jana jijini Dodoma na Waziri wa Viwanda na Biashara, Dk Selemani Jafo wakati akiwasilisha makadirio ya mapato na matumizi ya wizara yake kwa mwaka wa fedha 2025/2026 bungeni.
Alisema kati ya vifaa vilivyokaguliwa, 10,898 vilirekebishwa kutokana na kasoro ndogo zilizobainika, huku 761 vikiwa vimekataliwa kwa kushindwa kufikia viwango vya usahihi vinavyokubalika.
Alisema WMA imeendelea kusimamia ukaguzi wa bidhaa zilizofungashwa tayari katika mipaka na bandari kupitia vituo vyake 13 vya uthibitishaji vilivyopo katika maeneo ya Sirari, Mtukula, Namanga, Holili, Tunduma, Tarakea, Horohoro, Kasumulu, Kwara, Bagamoyo, Manyovu, Mbweni na Temeke.
Alisema Wakala pia umefanya uthibitishaji wa kiasi cha mafuta ya petroli na mafuta ya kupikia yanayoingia nchini kupitia bandari za Dar es Salaam, Tanga na Mtwara.
‘Katika kipindi cha miaka minne iliyopita, jumla ya lita bilioni 30.6 za mafuta kutoka kwa meli 546 zimethibitishwa, zikiwemo kiasi cha matumizi ya ndani na usafirishaji kwenda nchi za jirani,” alisema.
Aidha, Waziri alisema WMA imethibitisha tani 958,593.2 za gesi zilizoshushwa kutoka kwenye meli 210 kwa matumizi ya ndani.
Ili kuboresha utoaji wa huduma na kuimarisha ushirikiano na taasisi nyingine za serikali, Dk Jafo alibainisha kuwa Wakala umeanzisha vituo vipya vitano vya uthibitishaji katika mikoa ya Kinondoni, Temeke, Ilala, Misugusugu (Pwani), pamoja na kitengo maalum cha ukaguzi wa bidhaa zilizofungashwa zinazoingia nchini na kitengo cha ukaguzi bandarini.
“Juhudi hizi zimewezesha huduma za uthibitishaji kuwafikia wananchi kwa urahisi zaidi huku zikiimarisha ushirikiano na mamlaka za serikali za mitaa,” alisema.
Vilevile, alisema WMA imeanzisha vituo vitano vipya vya ukaguzi katika maeneo ya mipakani, na hivyo kufanya jumla ya vituo vya uthibitishaji kufikia 13 katika Tanzania Bara.
“Vituo hivi vina lengo la kuhakikisha kuwa kiasi cha bidhaa kinachoingizwa nchini kinazingatia usahihi uliotangazwa,” alisema.
Alisema katika kipindi cha miaka minne ya uongozi wa Rais Samia Suluhu Hassan, jumla ya vifaa vya vipimo 3,410,663 vimekaguliwa. Kati ya hivyo, 102,969 vilihitaji marekebisho, na 5,607 vilikataliwa.
Alitaja aina za vifaa vinavyokaguliwa mara kwa mara ni pampu za kujaza mafuta, vipimo vya ujazo wa mitungi ya gesi, mizani za masoko na rejareja, vipimo vya vifaa vya ujenzi, mizani za magari ya mizigo ya ujenzi, ujazo wa mbolea na pembejeo za kilimo, matangi makubwa ya kuhifadhia mafuta, mita za kupimia mafuta kwenye magari ya kusambaza, pamoja na mizani za magari makubwa na mabasi.
Alisema serikali imeendelea na ukaguzi wa bidhaa zilizofungashwa katika bandari, mipakani, na viwandani 108.
Alisema hadi kufikia Machi 2025, WMA ilikuwa ikiendelea na ukaguzi katika vituo vyake 13 vya Sirari (Mara), Mtukula (Kagera), Namanga (Arusha), Holili (Kilimanjaro), Tunduma (Songwe), Tarakea (Kilimanjaro), Horohoro (Tanga), Kasumulu (Mbeya), Kwara na Bagamoyo (Pwani), Manyovu (Kigoma), pamoja na Mbweni na Temeke (Dar es Salaam).
Bidhaa zilizokaguliwa ni pamoja na mbao, mbegu, mafuta ya kupikia, sabuni, maziwa, matunda, sukari, dawa ya meno, chumvi, vinywaji vya pombe, mbolea, vifaa vya ujenzi, gesi, nyaya, na maji ya chupa.
