Takukuru kukamilisha majengo 93 nchi nzima
ARUSHA: TAASISI ya Kuzuia na Kupambana na Rushwa (TAKUKURU) inatarajia kukamilisha ujenzi wa majengo 93 ya ofisi katika maeneo mbalimbali nchini ifikapo Julai 2027, ikiwa ni sehemu ya mkakati wa kusogeza huduma karibu na wananchi.
Mkurugenzi Mkuu wa TAKUKURU, Crispin Chalamila, alisema hayo wilayani Karatu mkoani Arusha wakati wa uzinduzi wa jengo la taasisi hiyo lililojengwa kwa gharama ya Sh milioni 405, kutoka bajeti ya awali ya Sh milioni 421.
Alisema serikali imeendelea kuiwezesha taasisi hiyo kwa fedha za ujenzi wa miundombinu ya ofisi pamoja na mafunzo ya kuwawezesha watumishi kutekeleza majukumu yao kwa kutumia mifumo ya kisasa.
Zawadi Ngailo Kamanda wa Takukuru Mkoa wa Arusha.
Alisema kuwa ifikapo mwaka 2030, kila wilaya nchini inatarajiwa kuwa na jengo la TAKUKURU lenye hadhi inayolingana na majukumu ya taasisi hiyo, hatua inayolenga kurahisisha upatikanaji wa huduma kwa wananchi.
Chalamila alisema uwekezaji huo hauishii kwenye miundombinu pekee, bali pia unahusisha kuimarisha idara za operesheni na uchunguzi ili kuongeza ufanisi katika kuzuia na kupambana na rushwa.
Akizungumzia gharama za ujenzi wa jengo la Karatu, alisema matumizi ya Sh milioni 405 badala ya bajeti ya Sh milioni 421, na kubaki kwa Sh milioni 15, yanaonesha umuhimu wa kuzingatia thamani ya fedha katika utekelezaji wa miradi ya umma.
Alizitaka halmashauri nchini kuzingatia misingi hiyo katika usimamizi wa miradi ya maendeleo ili kuhakikisha fedha za umma zinatumika kwa malengo yaliyokusudiwa.
Aidha, alisema TAKUKURU imeingiza elimu ya uzalendo, uadilifu, maadili na mapambano dhidi ya rushwa katika mitaala ya shule za msingi, sekondari na vyuo vya kati ili kujenga jamii inayozingatia misingi hiyo tangu ngazi za awali za elimu.
Baada ya kukata utepe kuashiria uzinduzi wa jengo la ofisi ya Takukuru wilaya ya Karatu
Alisema elimu hiyo inalenga kuwajengea wanafunzi uelewa wa madhara ya kutoa na kupokea rushwa pamoja na umuhimu wa kutekeleza majukumu kwa kuzingatia maadili.
Aliongeza kuwa taasisi hiyo inaendelea kuhamasisha uanzishwaji wa klabu za wapinga rushwa katika shule, vyuo, taasisi za dini na makundi mbalimbali ya kijamii ili kuongeza ushiriki wa wananchi katika mapambano dhidi ya vitendo hivyo.
Katika hatua nyingine, Chalamila alisisitiza umuhimu wa ushirikiano wa wananchi na kuzitaka halmashauri kuweka wazi taarifa za miradi ya maendeleo kwenye mbao za matangazo ili wananchi waweze kufuatilia utekelezaji wake na kujiridhisha kama thamani ya fedha imezingatiwa.
Kwa upande wake, Mkuu wa Wilaya ya Karatu, Lameck Karanga, alisema tangu kuanzishwa kwa wilaya hiyo, TAKUKURU ilikuwa ikitoa huduma katika nyumba za kupanga, hivyo kukamilika kwa jengo hilo kutaimarisha upatikanaji wa huduma za taasisi hiyo.
Jengo la ofisi ya Takukuru wilayani Karatu Mkoani Arusha.
Naye Kamanda wa TAKUKURU Mkoa wa Arusha, Zawadi Ngailo, alisema ujenzi wa jengo hilo ulianza Februari mwaka huu na kukamilika Agosti mwaka huu kwa kuzingatia muda na taratibu za manunuzi.
Alisema taasisi hiyo ilipata kiwanja cha ujenzi mwaka 2012 na kukamilisha taratibu za umiliki, huku Mkoa wa Arusha ukiwa na majengo manne ya ofisi yanayomilikiwa na TAKUKURU.
