Dk Kiruswa: Rais Samia aungwe mkono
ARUSHA: MGOMBEA Ubunge wa Jimbo la Longido, Dk Steven Kiruswa amewaomba wananchi wa Longido kumuunga mkono mgombea Urais wa Chama Cha Mapinduzi (CCM) Rais Samia Suluhu Hassan katika kinyang’anyiro cha Uchaguzi Mkuu Oktoba mwaka huu.
Dk Kiruswa amesema hayo leo Agosti 26, 2025 wakati akichukua fomu ya kuwania ubunge katika Ofisi ya Tume Huru ya Taifa ya Uchaguzi (INEC) ofisi za Halmashauri ya Wilaya ya Longido na mara baada ya kukabidhiwa na msimamizi mkuu, Nevellng Lyimo.
Amesema fedha za maendeleo zilizoletwa na mgombea Urais wa CCM kupitia serikali yake ni fedha nyingi haijawahi kutokea toka jimbo hilo lianzishwe hivyo shukrani pekee ya wana Longido ni kuhakikisha wanamuunga mkono kwa asilimia mia moja ili tumwonyesha imani kuwa wananchi wa Longido wanampenda kwa dhati.
‘’Wananchi wa Longido naomba msiniangushe nawaomba tumuunge mkono mgombea wa CCM Wagombea urais wako kumi na saba kutoka katika vyama mbalimbali kwani amefanya mambo makubwa hapa Longido kuhusu miradi ya maendeleo hivyo ni lazima tuwe na fadhila,’’amesema.
SOMA ZAIDI
Dk Kiruswa ambaye aliongozwa na msafara mkubwa wa magari,pikipiki,bajaji na watembea kwa miguu kutoka kata mbalimbali Longido kutoka nyumbani kwake hadi INEC ofisi za chama amesema na kusisistiza kuwa iwapo atachaguliwa tena atamalizia kata tatu kati ya kumi na saba za Jimbo jilo ambazo hajazitekeleza katika miradi ya maendeleo kutokana changamoto mbalimbali ikiwemo elimu.
Amesema pamoja na kumalizia kata hizo lakini bado atahakikisha kila kata ina maji ya uhakika, afya, barabara nzuri, na mawasiliano ili kila mmoja afurahie maendeleo ya serikali itakayoongozwa na Rais wa CCM kwani ana uhakika atachaguliwa kuiongoza serikali kwa kuwa wananchi wanamwamini na kumpenda.
Naye Mwenyekiti wa CCM Longido, Papa Nakuta amesema Longido ya sasa sio ile ya zamani kwani mgombea Urais wa CCM na mgombea ubunge wa Jimbo la Longido wote kwa pamoja wamefanya mambo makubwa kwa ajili ya wananchi wa Longido na kwa hilo amewataka wananchi kulipa fadhila ili wawe wa kwanza Kitaifa kumpa kura Rais ili aweze kuiongoza tena serikali.
Amesema Wilaya ya Longido ni wilaya ya kifugaji yenye changamoto nyingi na uhitaji mkubwa wa maji na afya na kufuatia hilo amewaomba wananchi kumpa kura zote Rais na Mbunge wake Kiruswa ili wafanye yale waliyoyapanga katika vipindi vyao vya miaka mitano.
Naye mwananchi wa kata ya Longido,Namnyaki Saiburu amesema kuwa wananchi wa Jimbo la Longido watampa kura Rais kwa asilimia mia moja na Mbunge Kiruswa kwani wamefanya mambo makubwa katika jimbo hilo katika kutatua changamoto kubwa ya maji safi na salama kwa asilimia kubwa.
